महिला अधिकाऱ्याला धक्काबुक्की, पुण्यात राष्ट्रवादीच्या माजी नगरसेवकाविरोधात गुन्हा दाखल

ऑफिसमध्ये जाऊन पुरवठा निरीक्षक महिलेला केली होती धक्काबुक्की

पुणे : अन्नधान्य वितरण कार्यालयातील निरीक्षक महिला अधिकाऱ्याशी हुज्जत घालून सरकारी कामात अडथळा आणल्याप्रकरणी राष्ट्रवादी काँग्रेसचे माजी नगरसेवक सुभाष जगताप यांच्या विरोधात गुन्हा दाखल करण्यात आला आहे.

याबाबत अन्नधान्य वितरण कार्यालयातील पुरवठा निरीक्षक महिला अधिकाऱ्याने समर्थ पोलीस ठाण्यात फिर्याद दिली आहे. सुभाष जगताप तळजाई वसाहत भागातील राष्ट्रवादी काँग्रेसचे माजी नगरसेवक आहेत. जगताप त्यांच्या प्रभागातील नागरिकांचे शिधापत्रिकेचे काम घेऊन जुन्या जिल्हा परिषद कार्यालयातील अन्नधान्य वितरण कार्यालयात आले होते. त्यावेळी पुरवठा निरीक्षक महिला अधिकारी कार्यालयातील सहकाऱ्यांशी बोलत होत्या. जगताप यांनी कार्यालयात आरडाओरडा केला. महिला अधिकाऱ्याशी हुज्जत घालून नोकरी घालवण्याची धमकी दिली.

जगताप यांनी कार्यालयातील सहकाऱ्यांसमोर अपमानित केल्याचे महिला अधिकाऱ्याने दिलेल्या फिर्यादीत म्हटले आहे. सरकारी कामात अडथळा तसेच विनयभंग केल्या प्रकरणी जगताप यांच्या विरोधात गुन्हा दाखल करण्यात आला. सहायक पोलीस निरीक्षक जाधव तपास करत आहेत.