‘ऑन ड्युटी’ पोलिसांच्या अंगावर घातली कार; अज्ञात कार चालकावर गुन्हा दाखल

पोलिसांनी गाडीची पाहणी केली. त्यावेळी ही गाडी लॉक करण्यात आल्याचे त्यांना दिसून आले.

बारामती : ‘ऑन ड्युटी’ असणाऱ्या पोलिसांच्या अंगावर कार घातल्याचा धक्कादायक प्रकार गुरुवारी (२९ मे) रोजी बारामतीत घडला. याप्रकरणी पोलिसांनी एका अज्ञात वाहनचालकाविरोधात गुन्हा दाखल केला असून, संबंधित कारचालकाचा शोध सुरू आहे. याप्रकरणी पोलिस हवालदार संतोष दत्तू कांबळे (रा. शिर्सूफळ, ता. बारामती) यांनी याबाबत फिर्याद दिली आहे. कांबळे बारामती तालुका पोलिस ठाण्यात चालक पदावर कार्यरत आहेत. ही घटना दि. २९ मे रोजी घडली आहे. कांबळे हे त्या दिवशी ऑन ड्युटी होते. यावेळी बारामती तालुका पोलिस ठाण्याजवळ एका बेकरीसमोर काळ्या रंगाची क्रमांक नसलेली कार चालक रहदारीच्या रस्त्यावर स्टंट करत असल्याची, तसेच कार वेडीवाकडी चालवून धोका निर्माण करत असल्याची माहिती पोलिसांना मिळाली. त्यानुसार कांबळे हे शासकीय वाहन (एमएच ४२, बीबी ७७४९) घेऊन घटनास्थळी पोहोचले.

पोलिसांनी गाडीची पाहणी केली. त्यावेळी ही गाडी लॉक करण्यात आल्याचे त्यांना दिसून आले. पोलिस परिसरात चौकशी करत असताना, एक २४ वर्षे वयाचा तरुण त्यांच्याजवळ आला. पोलिसांनी त्याला नाव विचारले असता, त्याने नाव सांगण्यास नकार दिला. तू मोटारीतून स्टंटबाजी का करतो, अशी त्यांनी विचारणा केली. त्यावर त्याने पोलिसांना अरेरावी केली. पोलिसांनी त्याला तू वाहन बाजूला घे, अथवा पोलिस ठाण्यात चल असे सांगितले. यावेळी त्या तरुणाने पोलिसांना शिवीगाळ, धक्काबुक्की करून गाडी क्रेनवरून कुठेही न्यायची नाही, असे म्हणत आरडाओरडा सुरू केला. माझ्या नादाला लागला, तर एकेकाला गाडीखाली घेऊन जीव घालवेन, अशी धमकी दिली.

त्याने गाडीमध्ये बसून सुरुवातीला गाडी मागे घेत फिर्यादीला जोराची धडक दिली. त्यात फिर्यादी हे डोक्यावर पडल्याने जखमी झाले. त्यांच्यासोबत असलेल्या अंमलदारांनी चालकास पकडण्याचा प्रयत्न केला, परंतु त्याने समोरील बाजूने गाडी अंगावर घालण्याचा प्रयत्न करत तो जोरात तेथून निघून गेला. दरम्यान कांबळे यांच्यावर खासगी रुग्णालयात उपचार सुरू आहेत. तपास बारामती तालुका पोलिस करीत आहेत.