मंचर: पुणे नाशिक महामार्गावर एकलहरे गावच्या हद्दीत कळंब बायपास चौकात भरधाव वेगातील बसणे मोटरसायकलला धडक देऊन झालेल्या अपघातात महिलेचा जागीच मृत्यू झाला आहे. तर एकजण जखमी झाला आहे. हा अपघात रात्री अकराच्या सुमारास झाला. रूपाली प्रणाल पडवळ (वय 28 रा. महाळुंगे पडवळ) असे अपघातात मृत्यू झालेल्या महिलेचे नाव आहे.
महाळुंगे पडवळ येथील अक्षय हनुमंत पडवळ हा हॉटेल माऊली येथे जेवण करून त्याची वहिनी रूपाली पडवळ यांना सोबत घेऊन घरी निघाला होता. पुणे नाशिक महामार्गावर एकलहरे गावच्या हद्दीत महामार्ग ओलांडून मोटरसायकल कळंबच्या दिशेने निघाली. यावेळी पुणे बाजूकडून बस वेगाने आली. या बसने मोटरसायकलला पाठीमागून धडक देऊन फरपटत नेले. या अपघातात मोटरसायकलवर मागे बसलेली रूपाली प्रणाल पडवळ या गंभीर जखमी होऊन त्यांचा मृत्यू झाला. तर चालक अक्षय हनुमंत पडवळ गंभीर जखमी झाला असून त्याची प्रकृती चिंताजनक आहे. अपघात झाल्यानंतर बस चालक कुठलीही मदत न करता तेथून फरार झाला आहे.
दरम्यान पुणे नाशिक महामार्गावर कळंब बायपास सुरू होणाऱ्या व छेद रस्ता असणाऱ्या या भागात स्पीड ब्रेकर नसल्याने वारंवार अपघात होत आहेत. येथे उड्डाणपूल करावा अथवा स्पीड ब्रेकर बसवावे अशी मागणी स्थानिकांनी केली आहे. प्रणित दौलत पडवळ याने फिर्याद दिल्यानंतर अज्ञात बस चालका विरोधात मंचर पोलिसांनी गुन्हा दाखल केला आहे. या प्रकरणाचा पुढील तपास पोलीस नाईक मोरे करत आहेत.