पक्षी धडकला; एअर इंडियाचे परतीचे उड्डाण थेट रद्द, विमानाची सविस्तर तांत्रिक तपासणी होणार

दरम्यान, अचानक झालेल्या या निर्णयामुळे काही प्रवाशांची गैरसोय झाली

पुणे : दिल्लीहून पुण्याच्या दिशेने निघालेल्या एअर इंडिया फ्लाइटला शुक्रवारी पहाटे पक्षी धडक बसल्याची घटना घडली. हे विमान सुरक्षितपणे पुणेविमानतळावर उतरल्यानंतर हा प्रकार निदर्शनात आला. त्यामुळे त्यानंतर पुणे ते दिल्ली जाणारे विमान रद्द करण्यात आले.

हे विमान दिल्लीहून पहाटे ५.३१ वाजता निघाले होते. लँडिंगनंतर नियमित तपासणीदरम्यान विमानाच्या बाह्यभागाला पक्षी धडकल्याचे निदर्शनास आले. हे विमान पुण्यावरून पुन्हा दिल्लीला जाणार होते (फ्लाइट एआय-२४७०), मात्र सुरक्षेच्या कारणास्तव उड्डाण रद्द करण्यात आले आहे, अशी माहिती एअर इंडियाच्या अधिकाऱ्यांनी दिली. विमानाची सविस्तर तांत्रिक तपासणी करण्यात येणार असून, त्यानंतरच ते पुन्हा सेवेत वापरण्यात येईल, असेही अधिकाऱ्यांनी स्पष्ट केले. दरम्यान, अचानक झालेल्या या निर्णयामुळे काही प्रवाशांची गैरसोय झाली. विमान कंपनीकडून पुण्यात अडकलेल्या प्रवाशांसाठी राहण्याची आणि इतर आवश्यक सोयींची व्यवस्था केली जात आहे. तसेच, या प्रवाशांना पूर्ण परतावा किंवा दुसऱ्या विमानाने जाण्याचा पर्याय दिला जात आहे. प्रवाशांना दिल्लीला पोहोचविण्यासाठी पर्यायी व्यवस्था करण्यात येत आहे, असेही एअर इंडियाने स्पष्ट केले.