पुणे : राज्याचे अन्न व नागरी पुरवठा मंत्री छगन भुजबळ यांनी शुक्रवारी आपल्या पुणे दौऱ्या दरम्यान राजशष्टिाचार बाजुला ठेऊन हमाल पंचायतच्या कष्टाची भाकर उपक्रमास भेट देऊन झुणका आणि भाकरीचा आस्वाद घेतला. झुणक्याची चव आवडल्याने त्यांनी तो पुन्हा मागवला.
हमाल पंचायतच्या ‘कष्टाची भाकर’ या उपक्रमास सवलतीच्या दरात धान्य पुरवठा केला जात होता. गेल्या वर्षीपासून तो बंद केला गेला आहे. सवलतीच्या दराने
धान्य पुरवठा पुर्ववत करावा, या मागणी संदर्भात मंत्री भुजबळ आणि ज्येष्ठ कामगार नेते डॉ.बाबा आढाव यांची चर्चा झाली.
चर्चेमध्ये बाबा आढाव यांनी सद्य:परिस्थितीचा भुजबळ यांना आढावा घेतला. त्यानंतर मंत्री भुजबळ यांनी धान्य पुरवठा कसा सुरळीतपणे चालु करता येईल, याबाबत लवकरच संबंधित अधिकारी यांच्यामध्ये चर्चा करुन योग्य तो मार्ग काढण्याचे आश्वासन दिले.
धान्य पुरवठा हा केंद्र सरकारकडून होत असतो. त्यामुळे सर्व बाबींचा विचार करुन बाबांनी एक पर्याय दिला तर या विषयाबाबत लवकरात लवकर निर्णय घेणे सोपे होईल, असे देखील भुजबळ यांनी यावेळी सांगितले.
यावेळी श्री छत्रपती शिवाजी मार्केटयार्ड कामगार युनियनचे अध्यक्ष किसन काळे, सचिव संतोष नागरे, खजिनदार विजय चोरघे हमाल पंचायत कष्टकरीचे चंद्रकांत मानकर, दिलीप मानकर, गोरख मेंगडे तसेच अंगमेहनती कष्टकरी
संघर्ष समितीचे निमंत्रक नितीन पवार हे देखील यावेळी उपस्थित होते.