बारामतीत

वाढती रुग्णसंख्या रोखण्याचे प्रशासनासमोर आव्हान

बारामती: शहर व तालुक्यात सुपर स्प्रेडरमुळे कोरोना रूग्ण संख्या सातत्याने वाढत आहेत. प्रशासनाच्या वतीने सुपर स्प्रेडरच्या शोधासाठी हॉटस्पॉट गावांमध्ये अँटिजेन तपासण्या सुरू करण्यात आल्या आहेत. जवळपास १६ गावांमध्ये १३९ सुपर स्प्रेडर आतापर्यंत सापडले आहेत. मात्र संचारबंदी असतानाही वेगवेगळ्या कारणांसाठी लोक गर्दी करत असल्याने रूग्णसंख्या आटोक्यात येत नसल्याचे चित्र आहे.

कोरोनाच्या दुसऱ्या लाटेने बारामती शहर व तालुक्यात कहर केला आहे. दररोजची रूग्णसंख्या देखील ४०० च्या घरात पोहोचली आहे. तत्पूर्वी कोरोना संसर्ग रोखण्यासाठी ५ एप्रिलपासून बारामती शहर व तालुक्यामध्ये टाळेबंदी, तसेच कडक निर्बंध लावण्यात आले. मात्र २० दिवस उलटले तरी रूग्णसंख्या आटोक्यात येत नसल्याचे चित्र आहे. मागील आठवड्यात झालेल्या आढावा बैठकिमध्ये उपमुख्यमंत्री अजित पवार यांनी शहर व तालुक्यातील सुपर स्प्रेडरचा शोध घेण्याच्या सूचना प्रशासनाला दिल्या होत्या. त्यानुसार फिरत्या लॅबच्या माध्यमातून बारामती शहरात शुक्रवार (दि. २३) पासून विनाकारण बाहेर फिरणाऱ्यांच्या अँटिजेन तपासण्या सुरू करण्यात आल्या. तसेच तालुक्यातील १६ हॉटस्पॉट गावांमध्ये देखील सुपर स्प्रेडरच्या शोधासाठी अँटिजेन तपासण्या करण्यात आल्या आहेत. यामध्ये दुकानदार, भाजीपाला विक्रेते यांच्या तपासण्या करण्यात येत आहेत. तालुक्यात आतापर्यंत तब्बल १३९ सुपर स्प्रेडरची नोद झाली आहे, अशी माहिती तालुका आरोग्य विभागाच्या वतीने देण्यात आली.

एकिकडे संक्रमित रूग्णांना उपचारासाठी करावी लागणारी पळापळ, प्रत्येक रूग्णाला उपचार मिळावा यासाठी प्रशासनाला करावी लागणारी तारेवरची कसरत यामुळे बारामती शहर व तालुक्यातील जनजीवन विस्कळीत झाले आहे. दररोज वाढणारी रुग्णसंख्या प्रशासनासाठी चिंतेचा विषय आहे. तसेच कारवाई होत असूनसुद्धा विनाकारण रस्त्यावर होणारी गर्दी यामुळे वाढत्या रूग्णसंख्येला खतपाणी मिळत आहे.

--------------------------------

दुसऱ्या लाटेमध्ये संक्रमणाचा वेग जास्त आहे. पहिल्या लाटेमध्ये वृद्ध व्यक्तींना संक्रमणाचा धोका अधिक असल्याचे निदर्शनास आले होते. मात्र दुसऱ्या लाटेमध्ये तरुण व्यक्तीसुद्धा कोरोनामुळे गंभीर होत आहेत. त्यामुळे मास्क, सॅनिटायझर आणि सुरक्षित अंतर या त्रिसूत्रीचा अधिकाधिक प्रभावी वापर प्रत्येकाने करावा.

- मनोज खोमणे

तालुका आरोग्य अधिकारी

---------------------------------

बारामतीतील शुक्रवार (दि. २३)

पर्यंतची कोरोना रूग्ण स्थिती...

एकूण रूग्णसंख्या - १५,४७६

एकूण बरे झालेले - ११,५१४

एकूण मृत्यू - २७०

नव्याने संक्रमित - ३११

शुक्रवारी झालेले लसीकरण - ४,३८८

एकूण लसीकरण - ८२,२१९

--------------------------------

विनाकारण फिरणाऱ्यांची रॅपिड अँटिजेन तपासणी

सांगवी : सांगवी (ता. बारामती) येथे आरोग्य विभाग व पोलीस प्रशासनाकडून विनाकारण रस्त्यावरून फिरणाऱ्या नागरिकांची रॅपिड अँटिजेन तपासणी करण्यात आली. दरम्यान दोन जण पॉझिटिव्ह आले आहेत. या वेळी बारामती तालुका पोलीस ठाण्याचे सहायक पोलीस निरीक्षक योगेश लंगुटे यांनी पॉझिटिव्ह रुग्णांना घाबरून न जाता योग्य उपचार घेण्यासाठी सल्ला देऊन दिलासा दिला. या वेळी विनाकारण फिरणाऱ्यांना बारामती तालुका पोलिसांनी चांगलाच धसका दिला. तसेच नियम तोडणाऱ्यावर दंडात्मक कारवाई करण्यात आली. दरम्यान, बारामती-फलटण रस्त्यावर विनाकारण ये-जा करणाऱ्या नागरिकांना पोलिसांनी इशारा करताच काहींनी पळापळ सुरू करून थेट घरचा रस्ता धरला. यामुळे आता मोकाट फिरणारांची चांगलाच धसका घेऊन घरातच बसण्याचा निर्णय घेतला.

-----------------------------------

फोटो ओळी : सांगवी येथे फलटण रस्त्यावर विनाकारण फिरणाऱ्यांची अँटिजेन तपासणी करण्यात आली.

२४०४२०२१-बारामती-०९

------------------------------------