सुनेविरोधात कोर्टातून सोडचिठ्ठी मिळवून देण्याचे आमिष; शेतकऱ्याकडून ६ लाख लुटले, तोतया वकील महिलेस अटक

आरोपीने अशिक्षित व अडाणीपणाचा गैरफायदा घेऊन शेतकऱ्याला वकील असल्याचे खोटे सांगून दिशाभूल केली

लोणी काळभोर : वयोवृद्ध शेतकऱ्याच्या सुनेविरोधात कोर्टातून सोडचिठ्ठी मिळवून देण्याचे आमिष दाखवून शेतकऱ्याकडून सुमारे ६ लाख लुटणाऱ्या बोगस महिला वकिलाला लोणी काळभोरपोलिसांनी अटक केली आहे. ही कारवाई पोलिसांनी लोणी काळभोर (ता. हवेली) ग्रामपंचायत हद्दीत बुधवारी (दि. २८) दुपारी तीन वाजण्याच्या सुमारास केली आहे.स्नेहल हरिश्चंद्र कांबळे (वय ३२, रा. लोणी काळभोर ता. हवेली जि. पुणे) असे अटक करण्यात आलेल्या महिलेचे नाव आहे. याप्रकरणी कडु बाबुराव सातपुते (वय. ६३, रा. दहिगाव माळी गल्ली, ता. शेवगाव जि. अहिल्यानगर) यांनी लोणी काळभोर पोलीस ठाण्यात फिर्याद दिली आहे.

पोलिसांनी दिलेल्या माहितीनुसार, फिर्यादी कडु सातपुते हे दहिगाव माळी येथे कुटुंबासोबत राहतात. ते शेती करून कुटुंबाचा उदरनिर्वाह चालवतात. दरम्यान त्यांच्या एका मुलाचा विवाह झाला होता. तेव्हा त्यांचा मुलगा आणि सुनेची नेहमी भांडणे होत होती. त्यामुळे फिर्यादी यांना त्यांच्या मुलासाठी सुनेकडून सोडचिठ्ठी करून घ्यायची होती. दरम्यान, आरोपी स्नेहल कांबळे हिने फिर्यादी यांच्या अशिक्षित व अडाणीपणाचा गैरफायदा घेऊन त्यांना वकील असल्याचे खोटे सांगून दिशाभूल केली. तसेच तिने सातपुते यांना कोर्टात त्यांची सुन सुरेखा यांच्यापासून सोडचिठ्ठी घेऊन देण्याचे आमिष दाखविले. फिर्यादी यांच्याकडून वेळोवेळी रोख व बँक खात्यावर पैसे घेऊन, सोडचिठ्ठी करुन न देता त्यांची आर्थिक फसवणुक केली आहे. सदर प्रकार हा २४ एप्रिल २०२५ ते २८ मे २०२५ या कालावधीत घडला आहे.आरोपी स्नेहल कांबळे हिने कडु सातपुते यांना त्यांच्याविरुद्ध त्यांच्या सुनेने बलात्काराचा व मारहाणीचा गुन्हा दाखल केला आहे. तसेच तीने महिला आयोगाकडेही तक्रार केली आहे, असे खोटे कारणं सांगून त्यांच्याकडून पोलीस व कोर्ट कर्मचारी यांना पैसे द्यावे लागतील, नाहीतर त्यांना अटक होईल, अशी खोटी माहिती देवुन त्यांना वेळोवेळी अटकेची भिती दाखविली. त्यानंतर त्यांच्याकडून वेळोवेळी ऑनलाईन व रोख स्वरुपात एकुण ५ लाख ९४ हजार ६० रुपये रक्कम खंडणी स्वरुपात स्वीकारली आहे.

दरम्यान, कडु सातपुते यांनी याप्रकरणी लोणी काळभोर पोलीस ठाण्यात तक्रार दिली होती. त्यानुसार पोलिसांनी लोणी काळभोर (ता. हवेली) ग्रामपंचायतीच्या गाळ्यांच्या परिसरात सापळा रचला होता. तेव्हा कडु सातपुते यांच्याकडून १५ हजार रुपयांची खंडणी स्वीकारताना स्नेहल कांबळे यांना रंगेहाथ पकडण्यात आला आहे. त्यांच्यावर लोणी काळभोर पोलीस ठाण्यात गुन्हा दाखल करण्यात आला आहे.

ही कामगिरी पुणे शहर पोलीस उपायुक्त डॉ. राजकुमार शिंदे,सहाय्यक पोलीस आयुक्त अनुराधा उदमले यांच्या मार्गदर्शनाखाली लोणी काळभोर पोलीस ठाण्याचे वरिष्ठ पोलीस निरीक्षक राजेंद्र  पन्हाळे, पोलीस उपनिरीक्षक रत्नदीप  बिराजदार, पूजा माळी, पोलिस हवालदार ज्योती नवले, पोलिस अंमलदार अजिंक्य जोजारे, मंगेश नानापुरे, संदीप धुमाळ व त्यांच्या सहकाऱ्यांनी केली आहे.