टपर्‍यांवर कारवाई

संत तुकारामनगर पोलीस चौकीसमोरील म्हाडाच्या ३ एकर जागेवर असलेल्या ५० टपर्‍या अतिक्रमण विभागाच्या मदतीने कारवाई करून हटविण्यात आल्या

नेहरूनगर : संत तुकारामनगर पोलीस चौकीसमोरील म्हाडाच्या ३ एकर जागेवर असलेल्या ५० टपर्‍या अतिक्रमण विभागाच्या मदतीने कारवाई करून हटविण्यात आल्या. सोमवारी सकाळी १० वाजता या कारवाईला सुरुवात करण्यात आली. कारवाई दिवसभर सुरू होती. संत तुकारामनगर, वल्लभनगर या मुख्य रस्त्यालगत संत तुकारामनगर पोलीस चौकीसमोर म्हाडाची ३ एकर जागा आहे. ही जागा मुख्य रस्त्यालगत असल्यामुळे या रस्त्यालगत चायनिज, वडापाव पानटपर्‍या, चिकन, फुल विक्रेते यांनी अतिक्रमण केले होते. सोमवारी सकाळी म्हाडाचे अधिकारी विवेक पाटील, अशोककुमार वास्ते, संजय नाईक यांच्या उपस्थितीत महानगर पालिकेच्या अतिक्रमण विभागाच्या मदतीने २ जेसीबी, २ क्रेनच्या साह्याने येथील टपर्‍या हटविण्यात आल्या. काही टपरीचालकांनी स्वत:हूनच आपल्या टपर्‍या काढून घेतल्या. कारवाई दरम्यान पोलीस उपनिरीक्षक व्ही.व्ही. पाटील, चपाईतकर यांच्यासह ७ पोलीस कर्मचारी, अतिक्रमण विभागाचे १० कर्मचारी तैनात करण्यात आले होते. या टपर्‍यांना वारंवार नोटिसाही दिल्या होत्या. मात्र, टपरीधारक नोटिशीला दाद देत नव्हते. म्हणून आज सकाळी दहापासून म्हाडा आणि महापालिकेने अनधिकृत टपर्‍या हटविण्याची मोहीम राबविली. या वेळी मोठ्याप्रमाणावर पोलीस बंदोबस्त होता. सुरुवातीला काही टपरीधारकांनी कारवाईला विरोध केला मात्र, पोलीस बंदोबस्तामुळे विरोध मावळला. म्हाडाने कारवाई केल्यामुळे रस्ता रिकामा झाला आहे. परंतु अतिक्रमण कारवाईनंतर पुन्हा अतिक्रमण होऊ नये यासाठी प्रशासनाने लक्ष देण्याची आवश्यकता आहे. (प्रतिनिधी)