पुणे : भारतीय जनता पक्षाचा (भाजप) एक पदाधिकारी जाणीवपूर्वक मानसिक त्रास देत असल्याची तक्रार महापालिकेतील एका महिला अधिकाऱ्याने थेट राज्य महिला आयोगाकडे केली आहे. यापूर्वीही या पदाधिकाऱ्याची सुरक्षा विभागाने पोलिसात तक्रार केली आहे. भाजपच्या नेत्यांकडेही तक्रार केली आहे. मात्र, त्यावर काहीच कारवाई झाली नाही. दरम्यान, महिला आयोगाने या तक्रारीची दखल घेतली असून महापालिकेकडून माहिती घेतल्याचे सांगितले जात आहे. भाजपच्या एका आघाडीचा शहराध्यक्ष सोबत दहा ते पंधरा कार्यकर्ते सोबत घेवून महापालिका भवनात येतो. अनेकवेळा महापालिकेच्या प्रवेशद्वारापासूनच हे लोक घोषणाबाजी करत व गोंधळ घालत आतमध्ये येताना दिसतात.
याबाबत संबंधित महिलेने जानेवारी महिन्यात महापालिका आयुक्तांकडे लेखी तक्रार केली. काम करताना सुरक्षित वातावरण मिळावे, यासाठी कार्यवाही करण्याची विनंती केली होती. तसेच महापालिकेच्या आरोग्य विभागाच्या अंतर्गत महिला तक्रार निवारण समितीकडेदेखील तक्रार दिली होती.या तक्रारीवर समितीसमोर सुनावणी झाली. मात्र, पुढे नक्की काय कारवाई झाली, हे समितीकडून कळविण्यात आले नाही, अशी तक्रार या महिला अधिकाऱ्याने केली. तक्रारी नंतर देखील संबंधित पदाधिकारी कार्यालयात येऊन त्रास देत असल्याने महिलेने राज्य महिला आयोगाच्या अध्यक्ष रूपाली चाकणकर यांच्याकडे याबाबत लेखी तक्रार दाखल केली. या तक्रारीची तातडीने दखल घेऊन आयोगाच्या अधिकाऱ्यांनी गेल्या आठवड्यात महापालिकेला भेट देऊन संबंधित अधिकाऱ्यांकडून तसेच महापालिकेतील इतरांकडून माहिती देखील घेतली आहे. महापालिकेतील वरिष्ठ अधिकाऱ्यांनी या माहितीला दुजोरा दिला.
आरोग्य विभागातील दोन महिला अधिकाऱ्यांची तक्रार समितीकडे आली होती. त्याचा अहवाल महापालिका आयुक्तांकडे पाठवून समितीने आवश्यक त्या शिफारशी केल्या आहेत.- डॉ. कल्पना बळीवंत अध्यक्ष, अंतर्गत महिला तक्रार निवारण समिती, पुणे महापालिका