पुणे : सहा महिन्यांपूर्वी झालेल्या भांडणाच्या रागातून पोलिसांच्या रेकॉर्डवरील गुन्हेगाराचा खून केल्याप्रकरणी दत्तवाडी पोलिसांनी ४ गुन्हेगारांसह ५ जणांना अटक केली.
निखिल बाळ बोत्रे (वय ३०, रा. नवी पेठ), राकेश ऊर्फ रोहित प्रकाश खिलारे (वय ३७), प्रवीण ऊर्फ पिल्या गणपत गाडे (वय ३१, रा. शांतीनगर, दांडेकर पूल), सूरज संजय बोत्रे (वय २९, रा. नवी पेठ), अमरदीप मुकुंद भालेराव (वय २८, रा. शांतीनगर) अशी अटक केलेल्यांची नावे आहेत.
अक्षय शिवाजी किरतकर्वे (वय २५, रा. दांडेकर पूल, शांतीनगर, दत्तवाडी) असे खून झालेल्याचे नाव आहे. अक्षय किरतकर्वे हाही पोलिसांच्या रेकॉर्डवरील आहे. आरोपी व त्यांची सहा महिन्यांपूर्वी भांडणे झाली होती. अक्षय व त्याचा भाऊ ओंकार हे जुन्या दत्तवाडी रोडवरील ११ जुलै रोजी सायंकाळी पावणेसात वाजता जात होते. त्या वेळी जुन्या भांडणाच्या रागातून आरोपींनी कोयता, लाेखंडी रॉड व लाथाबुक्यांनी मारहाण करून अक्षय याचा खून केला. या वेळी तेथे मोठी गर्दी जमली होती. लोकांनी त्याच्या मदतीला येऊ नये, म्हणून त्यांनी हातातील हत्यारांची भीती दाखवून दहशत निर्माण केली. मध्ये आल्यास जिवे मारण्याची धमकी दिल्याने लोकांनी दारे खिडक्या बंद केल्या होत्या.
आरोपींची माहिती मिळाल्यावर गुन्हे शाखेच्या युनिट ३ व दत्तवाडी पोलिसांनी ५ आरोपींना अटक केली आहे.
या आरोपींना आज न्यायालयात हजर करण्यात आले. सरकारी वकील किरण बेंडभर यांनी सांगितले की, निखिल बोत्रे, राकेश खिलारे, सूरज बोत्रे हे रेकॉर्डवरील गुन्हेगार आहेत. या गुन्ह्यात वापरलेली हत्यारे जप्त करायची आहेत. त्याचे आणखी कोणी साथीदार आहेत का याचा तपास करायचा आहे. त्यानंतर न्यायालयाने पाचही जणांना १७ जुलैपर्यंत पोलीस कोठडी मंजूर केलीय.