शेअर बाजारात गुंतवणुकीच्या आमिषाने ४४ लाखांची फसवणूक

शेअर बाजारात गुंतवणूक केल्यास चांगला परतावा मिळेल, असे आमिष दाखविले

पुणे : शेअर बाजरात गुंतवणुकीच्या आमिषाने सायबर चोरट्यांनी एरंडवणे भागातील एका तरुणाची ४४ लाख रुपयांची फसवणूक केली. या प्रकरणी सायबर चोरट्यांविरुद्ध डेक्कन पोलिसांनी गुन्हा दाखल केला. अधिक माहितीनुसार, तक्रारदार तरुण एरंडवणे भागात राहायला आहे. चोरट्यांनी ६ नोव्हेंबर रोजी तरुणाच्या मोबाइल क्रमांकावर संपर्क साधला. शेअर बाजारात गुंतवणूक केल्यास चांगला परतावा मिळेल, असे आमिष दाखविले. त्यानंतर, चोरट्यांनी तरुणाला रक्कम गुंतविण्यास सांगितले.

चोरट्यांच्या खात्यावर तरुणाने वेळोवेळी पैसे जमा केले. सुरुवातीला चोरट्यांनी तरुणाला परताव्यापोटी काही रक्कम दिली. त्यानंतर, त्यांना परतावा दिला नाही. फसवणूक झाल्याचे लक्षात आल्यानंतर तरुणाने पोलिसांकडे तक्रार दिली.

कारवाईची भीती दाखवून घातला गंडा 

मगरपट्टा येथील एका तरुणीला तुमच्या आधार कार्डचा गैरवापर करून मनी लॉन्ड्रिंग झाले. या प्रकरणी गुन्हा दाखल करण्यात येणार असल्याची भीती दाखवून सायबर चोरट्यांनी एका तरुणीची सहा लाख रुपयांची फसवणूक केली. याबाबत एका २४ वर्षीय तरुणीने हडपसर पोलिस ठाण्यात फिर्याद दिली आहे. तक्रारदार तरुणीच्या मोबाइल क्रमांकावर सायबर चोरट्यांनी संपर्क साधला. तुमच्या बँक खात्याचा मनी लॉन्ड्रिंगसाठी वापर झाला आहे, अशी भीती चोरट्यांनी तरुणीला दाखविली. मोबाइलवर संपर्क साधून राष्ट्रीय तपास यंत्रणेतील (एनआयए) अधिकारी बाेलत असल्याची बतावणी केली. अटक टाळण्यासाठी तातडीने पैसे जमा करावे लागतील, अशी भीती दाखविली. तरुणीला बँक खात्यात पैसे जमा करण्यास सांगण्यात आले. तरुणीची पाच लाख ८९ हजार रुपयांची फसवणूक केली. पोलिस उपनिरीक्षक अमर काळंगे तपास करत आहेत.