हगवणे प्रकरणात जेसीबीचा अनधिकृत ताबा घेणाऱ्या ३ खोट्या बँक अधिकाऱ्यांना अटक

शशांक हगवणे यानेच तिघांना खोटे अधिकारी बनवून पाठवल्याची धक्कादायक माहिती समोर आली आहे

चाकण : हगवणे प्रकरणात तोतया बँक अधिकाऱ्यांची भूमिका उघडकीस आली असून, इंडसइंड बँकेचे अधिकारी असल्याचे भासवत तिघांनी जबरदस्तीने जेसीबी मशीन ताब्यात घेतल्याप्रकरणी महाळुंगे एमआयडीसी पोलिसांनी त्यांना अटक केली आहे. ही कारवाई आज (५ जून) पहाटे दोन वाजण्याच्या सुमारास ही कारवाई करण्यात आली. योगेश राजेंद्र रासकर (वय २५ वर्षे,रा. तळेगाव ढमढेरे,ता.शिरुर),गणेश रमेश पोतले (वय ३० वर्षे, रा.मोहितेवाडी,ता.खेड),वैभव मोहन पिंगळे (वय. २७ वर्षे,रा.तळेगाव ढमढेरे,ता.शिरूर) याना अटक करण्यात आली आहे. शशांकने या तिघांना खोटे अधिकारी बनवून पाठवल्याची धक्कादायक माहिती समोर आली आहे. 

महाळुंगे एमआयडीसी पोलीस ठाण्यात लता हगवणे व शशांक हगवणे यांच्याविरोधात फसवणूक विश्वासघात आणि आर्म्स अ‍ॅक्ट अंतर्गत गुन्हा दाखल आहे. या गुन्ह्याच्या तपासादरम्यान इंडसइंड बँकेच्या लीगल टीमने पोलिसांना स्पष्ट केले की, गुन्ह्यातील जेसीबी मशीन ताब्यात घेण्यासाठी त्यांनी कोणत्याही रिकव्हरी एजन्सीला किंवा प्रतिनिधींना अधिकृत निर्देश दिलेले नाहीत. मात्र, खालील तिघांनी बँकेचे अधिकारी असल्याचे भासवून फिर्यादी चालकाकडून जेसीबी मशीन अनधिकृतपणे ताब्यात घेतली आणि ती आरोपी शशांक हगवणे याच्या ताब्यात दिली. त्यामुळे पोलिसांनी तिघांना अटक केली आहे. शशांक हगवणे यानेच त्या तिघांना जेसीबी मशीन ताब्यात घेण्यासाठी पाठवले होते. 

वरील तिघांविरुद्ध फसवणूक, गैरवर्तन व बनावट ओळख सादर करून अनधिकृत ताबा मिळविल्याचा ठपका ठेवण्यात आला आहे. या घटनेमुळे बँक प्रतिनिधी असल्याचे भासवून वसुली करणाऱ्या टोळ्यांविरोधात कारवाईची गरज अधोरेखित झाली आहे. महाळुंगे एमआयडीसी पोलीस अधिक तपास करत आहेत.