"बाटला हाऊस एन्काऊंटरवर अश्रू ढाळणाऱ्या सोनिया गांधीचा वाण आणि गुण उद्धव ठाकरेंना लागलाय, म्हणूनच…’’

BJP MLA Atul Bhatkhalkar Criticize Shiv Sena: ८४ वर्षांचा एक गलितगात्र राजशकट उलथवून टाकू शकतो इतका हा देश भुसभुशीत पायावर उभा आहे काय? असा सवालही संजय राऊत यांनी उपस्थित केला होता.

मुंबई - भीमा-कोरोगाव खटल्यात आरोपी असलेले फादर स्टेन स्वामी यांचे नुकतेच रुग्णालयात उपचारांदरम्यान निधन झाले. स्टेन स्वामी यांच्या मृत्यूनंतर त्यांच्या मृत्यूसाठी सरकारला जबाबदार ठरवून समाजातील विविध लोकांकडून टीका होत आहे. दरम्यान, शिवसेनेचे (Shiv Sena) मुखपत्र असलेल्या सामनामधील एका लेखातून संजय राऊत यांनी स्टेन स्वामींच्या मृत्यूवरून केंद्रातील मोदी सरकारवर निशाणा साधला होता. तसेच ८४ वर्षांचा एक गलितगात्र राजशकट उलथवून टाकू शकतो इतका हा देश भुसभुशीत पायावर उभा आहे काय? असा सवालही संजय राऊत यांनी उपस्थित केला होता. मात्र सामनातील या लेखावरून आता भाजपाने (BJP MLA Atul Bhatkhalkar ) शिवसेना आणि मुख्यमंत्री उद्धव ठाकरेंवर निशाणा साधला आहे. (BJP MLA Atul Bhatkhalkar Says, "Uddhav Thackeray has the qualities and qualities of Sonia Gandhi who shed tears at the Batla House encounter")

संजय राऊत यांनी लिहिलेल्या या लेखावरून भाजपा आमदार अतुल भातखळकर यांनी ट्वीट करत शिवसेना आणि उद्धव ठाकरेंवर बोचऱ्या शब्दांत टीका केली आहे या ट्विटमध्ये भातखळकर म्हणतात, बाटला हाऊस एन्काऊंटरवर अश्रू ढाळणाऱ्या सोनिया गांधीचा वाण आणि गुण उद्धव ठाकरेंना लागला आहे. त्यामुळेच दलित आणि मुस्लिमांना सशस्त्र उठावाची ट्रेनिंग देण्याचा ठपका असलेल्या स्टेन स्वामीवर सामनाने छाती बडवली आहे. सामनात आज प्रसिद्ध झालेल्या लेखात स्टेन स्वामींचा उल्लेख ८४ वर्षांचा म्हातारा असा केला आहे. हे लाज कोळून प्यायले आहेत मतांसाठी, असा जळजळीत टोला अतुल भातखळकर यांनी लगावला आहे. 

बाटला हाऊस एन्काऊंटरवर अश्रू ढाळणाऱ्या सोनिया गांधीचा वाण आणि गुण उद्धव ठाकरेंना लागलाय.
त्यातूनच दलित आणि मुस्लिमांना सशस्त्र उठावाची ट्रेनिंग देण्याचा ठपका असलेल्या स्टेन स्वामीवर सामनाने छाती बडवली आहे. ८४ वर्षांचा म्हातारा म्हणे...
लाज कोळून प्यायले आहेत मतांसाठी.#जनाबसेना

— Atul Bhatkhalkar (@BhatkhalkarA) July 11, 2021

स्टेन स्वामींच्या मृत्यूवरून नरेंद्र मोदींवर निशाणा साधताना संजय राऊत म्हणाले होते की, मुस्कटदाबी करणाऱ्या जागतिक नेत्यांच्या यादीत नरेंद्र मोदींचे नाव प्रसिद्ध होत असताना मुंबईत फादर स्टेन स्वामी यांचा तडफडून आणि गुदमरून मृत्यू झाला. स्वामी हे राष्ट्रीय तपास यंत्रणेच्या कोठडीत बऱ्याच काळापासून होते. त्यांचे वय ८४ वर्षे होते. त्यांना ऐकता, बोलता येत नव्हते. दिसतही नव्हते. त्यांचा श्वास पूर्णपणे मंदावला असताना त्यांना तुरुंगातच कोरोनाने गाठले. त्यांना जीवनाच्या अंतिम समयी झारखंडमध्ये मित्रांसमवेत वेळ घालवायचा होता. पण स्वामींवर दहशतवाद, फुटिरतावाद, राज्य उलथून लावण्याच्या कटात सहभागी असल्याचा आरोप होता. ८४ वर्षांचा एक गलितगात्र राजशकट उलथवून टाकू शकतो इतका हा देश भुसभुशीत पायावर उभा आहे काय? अशा शब्दात राऊत यांनी मोदींवर टीका केली होती.