Accident : भिगवणजवळ भीषण अपघात;पुणे–सोलापूर महामार्गावर कारला कंटेनरची धडक;भाजप युवानेता थोडक्यात बचावला

माजी मंत्री तानाजी सावंत यांचे पुतणे आणि धाराशिव जिल्हा परिषदेचे माजी उपाध्यक्ष धनंजय सावंत यांच्या फॉर्च्युनर कारला भरधाव कंटेनरने जोरदार धडक दिली.

भिगवण (ता. इंदापूर) :पुणे–सोलापूर राष्ट्रीय महामार्गावर गुरुवारी मध्यरात्री भीषण अपघात घडला. माजी मंत्री तानाजी सावंत यांचे पुतणे आणि धाराशिव जिल्हा परिषदेचे माजी उपाध्यक्ष धनंजय सावंत यांच्या फॉर्च्युनर कारला भरधाव कंटेनरने जोरदार धडक दिली. अपघातात वाहनाचे मोठे नुकसान झाले असले तरी सावंत सुदैवाने थोडक्यात बचावले.
 
मिळालेल्या माहितीनुसार, धनंजय सावंत हे बुधवारी मुंबई येथे पार पडलेल्या पत्नी व कार्यकर्त्यांच्या भाजप प्रवेश सोहळ्यानंतर परंडा कडे निघाले होते. गुरुवारी पहाटे सुमारे १ वाजण्याच्या सुमारास भिगवण जवळील डाळज (नं. २) गावाच्या हद्दीत समोरून येणाऱ्या भरधाव कंटेनरने त्यांच्या फॉर्च्युनर (MH 12 SE 5559) कारला जोरदार धडक दिली.

धडकेची तीव्रता इतकी प्रचंड होती की आलिशान कारच्या चालकाच्या बाजूचा भाग पूर्णपणे चक्काचूर झाला. अपघातानंतर वाहनाचा पुढील भाग ओळखूही येत नव्हता, अशी माहिती प्रत्यक्षदर्शींनी दिली. दरम्यान, या अपघातात कारचालक आणि सुरक्षारक्षक किरकोळ जखमी झाले असून त्यांच्यावर उपचार सुरू आहेत. सुदैवाने धनंजय सावंत यांना गंभीर दुखापत झाली नाही.