नोकरी लावतो म्हणत पैसे उकळले; महापालिकेच्या नावाने बनावट नियुक्तिपत्र

- तरुणाने महापालिकेमध्ये याबाबत चौकशी केली असता अशा प्रकारे कोणतीही भरती प्रक्रिया राबवली नसल्याचे उघडकीस आले. त्यानंतर तरुणाने पोलिसात गुन्हा नोंदवला.

पिंपरी :पिंपरी-चिंचवड महापालिकेमध्ये शिपाई पदावर नोकरी देण्याचे आमिष दाखवून तरुणाकडून पैसे घेतले. त्यानंतर तरुणाला बनावट सही-शिक्क्याचे नियुक्तिपत्र आणि उमेदवारांच्या नावाचे परिपत्रक देऊन नोकरी लागल्याची खात्री पटवून दिली. तरुणाने महापालिकेमध्ये याबाबत चौकशी केली असता अशा प्रकारे कोणतीही भरती प्रक्रिया राबवली नसल्याचे उघडकीस आले. त्यानंतर तरुणाने पोलिसात गुन्हा नोंदवला.

सूरज सुनील नांगरे (वय २६, रा. काळेवाडी) यांनी याप्रकरणी फिर्याद दिली आहे. त्यानुसार वैष्णव कालिदास शेळके (२७) याच्या विरोधात शिपाई पदांसाठी भरती सुरू असल्याचे सांगून तरुणाची फसवणूक; एकावर गुन्हा दाखल; महापालिकेच्या वतीनेही तक्रार फसवणुकीचा गुन्हा दाखल आहे. हा प्रकार १ जानेवारी ते २० फेब्रुवारी या कालावधीत महापालिकेमध्ये घडला.

महापालिकेने मागील काही महिन्यांमध्ये कोणतीही पदभरती केलेली नाही. वैष्णव शेळके आणि फिर्यादी सूरज हे एकमेकांच्या ओळखीचे आहेत. वैष्णव याने सूरज यांना महापालिकेमध्ये शिपाई पदांसाठी भरती सुरू असल्याचे सांगून त्यांना महापालिकेमध्ये नोकरी लावून देतो, असे आमिष दाखवले. सूरज यांना खात्री पटावी यासाठी त्यांचे आधारकार्ड, पॅनकार्ड अशी कागदपत्रेदेखील वैष्णव याने घेतली. सूरज यांचा विश्वास संपादन करून त्यांच्याकडून वेळोवेळी ६५०० रुपये घेतले.

सूरज यांना महापालिकेमध्ये नोकरी लागल्याचे सांगून त्यांना महापालिकेच्या नावाने सही-शिक्का असलेले बनावट नियुक्तिपत्र आणि उमेदवारांच्या नावाचे परिपत्रक तयार करून सूरज यांना पाठवले. त्यांना मासिक १६ हजार रुपये पगार तसेच १६ हजार रुपये महागाई भत्ता मिळणार असल्याचे सांगण्यात आले. नियुक्तिपत्रावर विभाग, कामावर रुजू होण्याची तारीख नमूद केली. सूरज यांच्यासह महापालिकेच्या वतीनेदेखील याप्रकरणी कारवाई करण्याचा अर्ज पोलिसांना दिला.