Pimpari-chinchwad: आदिवासी मुलांच्या शासकीय वसतिगृहातील कूपनलिकेचे पाणी दूषित

पाणी योग्य नसल्याचे तपासणी अहवालात आले समोर; १२ मार्चला झाली होती ३५ विद्यार्थ्यांना विषबाधा 

पिंपरी : मोशी प्राधिकरणातील आदिवासी मुलांच्या शासकीय वसतिगृहात कूपनलिकेचे (बोअरवेल) पाणी पिण्यायोग्य नसल्याची धक्कादायक माहिती समोर आली आहे. हे पाणी पिल्याने वसतिगृहातील ३५ विद्यार्थ्यांना १२ मार्च रोजी विषबाधा झाली होती. या घटनेनंतर प्रशासनाने येथील पाण्याचे नमुने महापालिकेच्या प्रयोगशाळेत पाठविले होते. तपासणी अहवालात ही माहिती पुढे आली आहे.

२७० क्षमतेच्या वसतिगृहात परीक्षा झाल्याने सध्या १०० मुले राहतात. महापालिकेचा पाणीपुरवठा भूमिगत टाकीत होत असे. मात्र, वसतिगृह आवारातील कूपनलिकेचे पाणीही याच टाकीत सोडले जात होते. हे मिश्रित पाणी छतावरील टाकीतून फिल्टरमधून मुलांना पुरवले जात होते. त्यात फिल्टरही खराब असल्याने मुलांनी गृहपालांकडे पाण्याबाबत तक्रार केली होती, तरीही दुर्लक्ष झाले.

१२ मार्च रात्री अचानक ३५ विद्यार्थ्यांना उलट्या, जुलाब आणि मळमळ झाली. त्यामुळे त्यांच्यावर नवीन भोसरी रुग्णालयात उपचार केले होते. या घटनेनंतर महापालिकेच्या पाणीपुरवठा विभागाने वसतिगृहातील पाण्याचे नमुने तपासले. अहवालात कूपनलिकेचे पाणी दूषित असल्याचे स्पष्ट झाले. विद्यार्थ्यांना बाहेरून जारमधून पाणी पुरवले जात होते. घटनेची दखल घेत आदिवासी विकास विभागाने गृहपाल राजकुमार राक यांना सक्तीच्या रजेवर पाठवले. या घटनेनंतर भूमिगत टाकीची साफसफाई केली आहे. आता टाकीत फक्त महापालिकेचे पाणी साठवले जाते. फिल्टरची दुरुस्ती करून पुन्हा हे पाणी मुलांना दिले जात आहेत. 

महापालिका भूमिगत टाकीत पाणीपुरवठा करते. त्याच टाकीत कूपनलिकेचे पाणी सोडले जाते. महापालिका व कूपनलिकेच्या पाण्याचे नमुने प्रयोगशाळेत तपासले असता, कूपनलिकेचे पाणी पिण्यायोग्य नसल्याचे समोर आले. - चेतन देवरे, कनिष्ठ अभियंता, पाणीपुरवठा विभाग, महापालिका