शस्त्र तस्करी करणाऱ्या तीन सराईतांच्या आवळल्या मुसक्या; दहशतीसाठी आणलेले पाच पिस्तूल, २० काडतुसे जप्त

पिंपरी-चिंचवड मालमत्ता गुन्हे विरोधी पथकाची कारवाई

पिंपरी : पिस्तूल तस्करी करणाऱ्या तीन सराईत गुन्हेगारांच्या मुसक्या आवळल्या. त्यांच्याकडून देशी बनावटीचे पाच पिस्तूल व २० जिवंत काडतुसांसह ८ लाख ५६ हजार रुपयांचा मुद्देमाल जप्त केला. पिंपरी-चिंचवड गुन्हे शाखेच्या मालमत्ता गुन्हे विरोधी पथकाने ही कारवाई केली. 

उमेश चंद्रकांत केदारी (२८, रा. पुनावळे, ता. मुळशी), मंथन उर्फ गुड्डू अशोक सातकर (२८, रा. कान्हे, ता. मावळ), विशाल ज्योतीराम खानेकर (३०, रा. मोहितेवाडी, ता. मावळ) अशी अटक केलेल्यांची नावे आहेत. आरोपी सराईत गुन्हेगार असून उमेश केदारी याच्याविरुध्द यापूर्वी खुनाच्या गुन्ह्यासहीत चार गुन्हे दाखल आहेत. मंथन सातकर याच्याविरुध्द खुनाच्या प्रत्यत्नासह तीन गुन्हे दाखल आहेत. विशाल खानेकर याच्याविरुध्द शरीराविरुध्दचे दोन गुन्हे दाखल आहेत.

गुन्हे शाखेचे पोलिस उपायुक्त संदीप डोईफोडे यांनी दिलेल्या माहितीनुसार, मालमत्ता गुन्हे विरोधी पथकाचे वरिष्ठ पोलिस निरीक्षक विजय ढमाळ यांच्या मार्गदर्शनाखाली पथक गस्त घालत होते. त्यावेळी पथकातील पोलिस अंमलदार गणेश सावंत, सुमित देवकर व विनोद वीर यांना माहिती मिळाली की, तीन संशयित तळेगाव दाभाडे परिसरात फिरत आहेत. तसेच त्यांच्या कारला नंबरप्लेट नसून ते पिस्तूल तस्करीसाठी आले आहेत. त्यानुसार पथकाने कारमधून फिरणाऱ्या तिघांना सापळा रचून ताब्यात घेतले. त्यांची अंगझडती घेतली असता त्यांच्याकडे देशी बनावटीचे पाच पिस्तूल व २० जिवंत काडतुसे मिळाली. त्यासह दोन मोकळ्या मॅग्जीन, तीन मोबाईल फोन व कार असा ८ लाख ५६ हजार रुपयांचा मुद्देमाल जप्त केला.

मालमत्ता गुन्हे विरोधी पथकाचे वरिष्ठ पोलिस निरीक्षक विजय ढमाळ, उपनिरीक्षक भरत गोसावी, पोलिस अंमलदार सोमनाथ मोरे, गणेश सावंत, सुमित देवकर, विनोद वीर, हर्षद कदम, गणेश हिंगे यांच्या पथकाने ही कामगिरी केली.

पोलिस कोठडीत रवानगी

पोलिसांनी अधिक चौकशी केली असता संशयितांनी हे पिस्तूल तस्करी तसेच दहशत माजविण्यासाठी आणल्याचे समोर आले. त्यांना न्यायालयात हजर केले असता बुधवारपर्यंत (४ जून) पोलिस कोठडी सुनावण्यात आली.