दोघा विवाहीतांचं जुळलं..! सोबत राहण्याचा हट्ट करताच प्रेयसीचा ‘असा’ काढला काटा

- वाकड येथील कॅब चालक विवाहित प्रियकराकडून पेट्रोल ओतून मृतदेह जाळण्याचा प्रयत्न

पिंपरी :प्रेमसंबंधांबाबत कुटंबीयाना माहिती झाल्यानंतर विवाहित प्रेयसीने विवाहित प्रियकराच्या सोबत राहण्याचा हट्ट धरला. त्यामुळे त्याने तिचा गळा दाबून आणि डोक्यात लोखंडी पाइपने मारून खून केला. त्यानंतर मृतदेह पेट्रोल ओतून जाळण्याचा प्रयत्न केल्याची धक्कादायक घटना उघडकीस आली. याप्रकरणी वाकड पोलिसांनी तरुणाला अटक केली.

राणी विशाल गायकवाड (२६, रा. सम्राट चौक, वाकड) असे खून झालेल्या विवाहितेचे नाव आहे. या प्रकरणी वाकड पोलिसांनी अनिकेत महादेव कांबळे (३३, रा. गणेशनगर, थेरगाव) याला पोलिसांनी अटक केली. पोलिसांनी दिलेल्या माहितीनुसार, २६ नोव्हेंबर २०२५ रोजी राणी गायकवाड घरातून बेपत्ता झाल्याची माहिती तिच्या कुटुंबीयांनी वाकड पोलिसांना दिली. सहायक पोलिस निरीक्षक अंबरीश देशमुख यांच्या तपास पथकाने तातडीने तिच्या मोबाईल क्रमांकाचे तांत्रिक विश्लेषण सुरू केले. यात राणी गायकवाड सतत अनिकेत कांबळे याच्या संपर्कात असल्याचे समोर झाले. संशयित अनिकेत हा बार्शी–लातूर भागात गेल्याचे समोर आले. त्यानंतर वाकड पोलिसांनी अनिकेतला ताब्यात घेतले. पोलिसांनी ‘खाक्या’ दाखवताच त्याने गुन्ह्याची कबुली दिली.

पोलिस आयुक्त विनय कुमार चौबे, उपायुक्त विशाल गायकवाड, सहायक आयुक्त सुनील कुऱ्हाडे यांच्या मार्गदर्शनाखाली वरिष्ठ पोलिस निरीक्षक शत्रुघ्न माळी, पोलिस निरीक्षक (गुन्हे) किशोर पाटील, गुन्हे प्रकटीकरण पथकाचे सहायक पोलिस निरीक्षक अंबरीश देशमुख, श्रीनिवास दराडे, श्रेणी उपनिरीक्षक बिभीषण कन्हेरकर, सहायक फौजदार संदीप गवारी, पोलिस अंमलदार वंदु गिरे, कौतेंय खराडे यांच्या पथकाने ही कामगिरी केली.

सोबत राहण्याचा हट्ट केला अन्...

राणी आणि अनिकेत यांच्यात प्रेमसंबंध होते. राणी विवाहित असून तिला मुले आहेत. कुटुंबीयाना या संबंधांची माहिती झाल्याने तिने पती व मुलांना सोडून अनिकेतसोबत राहण्याचा हट्ट धरला. कॅबचालक असलेला अनिकेत देखील विवाहित असून त्यालाही मुले आहेत. त्यामुळे तो राणीला सोबत ठेवण्यास तयार नव्हता. मात्र, राणीने सोबत राहण्याचा हट्ट धरला. त्यामुळे राणीचा काटा काढण्यासाठी त्याने ‘प्लॅन’ केला. अनिकेतने बुधवार, दि. २६ नोव्हेंबर रोजी राणीला “गावी नेऊन ठेवतो” असे सांगत कारमध्ये बसवून शहरात फिरवले. तिच्यासाठी नवीन कपडे खरेदी केले.

पेट्रोल टाकून मृतदेह जाळला

अनिकेत आणि राणी कारमधून धाराशिव जिल्ह्यातील बार्शी-लातूर रस्त्यावरील ढोकी गावाजवळ पोहचले. त्यावेळी अनिकेतने गळा आवळून लोखंडी पाईपने डोक्यावर वार करून राणीचा खून केला. त्यानंतर गुन्हा लपवण्यासाठी पेट्रोल ओतून मृतदेह जाळण्याचा प्रयत्न केला. मात्र, मृतदेह पूर्णपणे जळाला नाही. त्यानंतर अनिकेत वाकड येथे आला.

खून करून पुरावे नष्ट करण्याचा प्रयत्न

राणी बेपत्ता झाल्याबाबत तपास करताना वाकड पोलिसांनी २७ नोव्हेंबर रोजी अनिकेत याला ताब्यात घेतले. त्याच्याकडे चौकशी केली असता त्याने गुन्हा केल्याची कबुली दिली. दरम्यान, २७ नोव्हेंबरला सकाळी ढोकी गावाजवळ अनोळखी मृतदेह आढळल्याबाबत स्थानिक पोलिसांना माहिती मिळाली. खून करून पुरावे नष्ट करण्याचा प्रयत्न केल्याप्रकरणी ढोकी पोलिस ठाण्यात गुन्हा दाखल करण्यात आला.