Crime News : लोणावळ्यात व्हिलामधून सायबर टोळीचा पर्दाफाश; कोटींची उलाढाल उघड

या कारवाईत चार जणांना अटक करण्यात आली असून त्यांच्याकडून मोठ्या प्रमाणात साहित्य जप्त करण्यात आले आहे.

पिंपरी : लोणावळा परिसरातील व्हिला व गेस्ट हाऊसमध्ये मुक्काम करून विविध बँक खात्यांद्वारे सायबर फसवणुकीची रक्कम फिरवणाऱ्या टोळीचा पिंपरी-चिंचवड सायबर पोलिसांनी पर्दाफाश केला. या कारवाईत चार जणांना अटक करण्यात आली असून त्यांच्याकडून मोठ्या प्रमाणात साहित्य जप्त करण्यात आले आहे.

मोनिल अतुलकुमार मोदी (वय २४, रा. मेहसाणा, गुजरात), रवी गोकल प्रसाद जाट (वय २१, रा. राजगड, मध्य प्रदेश), रुद्रपाल सिंग गजेंद्रसिंग चौहान (वय २२, रा. खंडवा, मध्य प्रदेश), हंश कैलास वर्मा (वय १९, रा. बोरीवली, मुंबई) अशी अटक करण्यात आलेल्यांची नावे आहेत. फिर्यादी यांनी शेअर ट्रेडिंगमध्ये गुंतवणुकीचे आमिष दाखवून ९७ लाख ७० हजार रुपयांची फसवणूक झाल्याची तक्रार दिली होती.

पोलिस उपायुक्त डॉ. शिवाजी पवार यांनी दिलेल्या माहितीनुसार, संशयितांनी लोणावळ्यातील व्हिलामध्ये लपून राहून विविध बँकांच्या करंट अकाउंटचा वापर करून सायबर फसवणुकीची रक्कम जमा व वर्ग केली. लोणावळ्यातील ४०० ते ५०० व्हिलामध्ये शोध घेऊन संशयितांना अटक केली. अटक केलेल्या संशयितांकडून लॅपटॉप, सात मोबाइल, १४ डेबिट कार्ड, वेब कॅमेरे आणि बँक किट असा मुद्देमाल जप्त करण्यात आला. संशयितांकडून एका खात्यात एक कोटींपेक्षा जास्त रक्कम फिरवल्याचे उघड झाले आहे.

संशयितांनी देशातील विविध बँकांमध्ये खाती उघडून त्यांचा गैरवापर केल्याची कबुली दिली आहे, तसेच परदेशातून वेब कॅमेऱ्याद्वारे त्यांच्यावर नियंत्रण ठेवले जात असल्याची धक्कादायक माहिती समोर आली आहे. या कारवाईत पिंपरी-चिंचवड सायबर पोलिसांच्या पथकाने महत्त्वाची भूमिका बजावली असून पुढील तपास सुरू आहे.

पोलिस आयुक्त विनय कुमार चौबे, सहआयुक्त डॉ. शशिकांत महावरकर, अतिरिक्त आयुक्त सारंग आव्हाड, उपायुक्त डॉ. शिवाजी पवार, सहायक आयुक्त डॉ. विशाल हिरे यांच्या मार्गदर्शनखाली सायबर पोलिस ठाण्याचे पोलिस निरीक्षक रविकिरण नाळे, सहायक निरीक्षक प्रवीण स्वामी, उपनिरीक्षक वैभव पाटील, सागर पोमण, रोहित डोळस, प्रकाश कातकाडे, विद्या पाटील, पोलिस अंमलदार दीपक भोसले, हेमंत खरात, विनायक म्हसकर, सुभाष पाटील, किरण देवकर, सौरभ घाटे, श्रीकांत कबुले, प्रवीण शेळंकदे, अतुल लोखंडे, सोपान बोधवड, माधव आरोटे, नितेश बिचेवार, दीपाली चव्हाण यांच्या पथकाने ही कामगिरी केली आहे.