Pimpari Accident: पिंपरीत भरधाव कारचा अपघात; जीवितहानी टळली, पोलीस तपास सुरू

Pimpari Accident Video: पोलिसांनी चालकासह कारमधील चार जणांना ताब्यात घेतले असून पुढील चौकशी सुरू आहे.

पिंपरी : पिंपरी-चिंचवड परिसरातील जगताप डेअरी चौकात मंगळवारी एक भीषण अपघात घडला. भरधाव वेगाने येणाऱ्या क्रेटा कारवरील चालकाचे नियंत्रण सुटल्याने गाडी थेट चौकातील सर्कलवर जाऊन आदळली. या जोरदार धडकेत सर्कलचा कठडा अक्षरशः तुटला असून कार त्यावर चढल्याचे दृश्य उपस्थितांनी पाहिले. 

सुदैवाने या अपघातात कोणतीही जीवितहानी झाली नाही. मात्र, अपघातामुळे काही काळ वाहतुकीत अडथळा निर्माण झाला होता आणि परिसरात मोठी गर्दी झाली होती. घटनेची माहिती मिळताच वाकड पोलीस तात्काळ घटनास्थळी दाखल झाले. पोलिसांनी चालकासह कारमधील चार जणांना ताब्यात घेतले असून पुढील चौकशी सुरू आहे. या दरम्यानचा व्हिडिओ समोर आला आहे.

दरम्यान, अपघाताच्या वेळी चालक मद्यधुंद अवस्थेत होता का, याबाबत शंका व्यक्त केली जात आहे. यासाठी चालकाची वैद्यकीय तपासणी करण्यात येणार असल्याचे पोलिसांनी सांगितले.