भाजपच्या पिंपरी चिंचवड शहराध्यक्षपदी जुना की नवा चेहरा? इच्छुकांच्या मुंबईपर्यंतच्या नेत्यांचे उंबरे झिजवण्यास सुरुवात

या पदासाठी खासदार, आमदार, विविध आघाड्या, युवा अध्यक्ष, सरचिटणीस, प्रकोष्ठ, सहप्रकोष्ठ अशा २६ पदाधिकाऱ्यांनी मतदान केले

पिंपरी : भारतीय जनता पक्षाच्या शहराध्यक्ष पदासाठी २६ प्रमुख नेत्यांनी गुप्त मतदान केले आहे. यानिमित्ताने जुना आणि नवा, खुला वर्ग आणि ओबीसी, असे नवे वाद उफाळून आले आहेत. त्यामुळे शहराध्यक्षपदी जुना की नवा कार्यकर्ता, याविषयी चर्चा रंगली आहे. या पदावर वर्णी लावून घेण्यासाठी इच्छुकांनी मुंबईपर्यंतच्या नेत्यांचे उंबरे झिजवण्यास सुरुवात केली आहे.

आमदार शंकर जगताप यांचा भाजप शहराध्यक्ष पदाचा कालावधी पूर्ण झाला आहे. त्यामुळे महिन्याभरापासून नवीन शहराध्यक्ष कोण होणार, याचे चर्चितचर्वण सुरू आहे. मागील आठवड्यामध्ये मंडल अध्यक्षांची निवड करण्यात आली. त्यानंतर पक्षाचे निरीक्षक सिद्धार्थ शिरोळे यांनी शहरात येऊन गुप्त मतदान घेतले. खासदार, आमदार, विविध आघाड्या, युवा अध्यक्ष, सरचिटणीस, प्रकोष्ठ, सहप्रकोष्ठ अशा २६ पदाधिकाऱ्यांनी मतदान केले. आता प्रदेश समितीची २ मेरोजी बैठक होणार आहे. त्यात पिंपरी-चिंचवडमधून कोणाला संधी द्यायची, यावर चर्चा होणार आहे. येत्या रविवारी किंवा सोमवारी निवड जाहीर होईल, असे विश्वसनीय सूत्रांनी सांगितले.

या नावांची आहे चर्चा

प्राधिकरणाचे माजी अध्यक्ष सदाशिव खाडे, माजी महापौर राहुल जाधव, माजी सत्तारूढ पक्षनेते नामदेव ढाके, स्थायी समिती अध्यक्ष विलास मडिगेरी, कार्यकारी अध्यक्ष शत्रुघ्न काटे, भाजप युवा मोर्चाचे राज्याचे अध्यक्ष अनुप मोरे, माजी नगरसेवक राजू दुर्गे, संजय मंगोडेकर, भाजपच्या महिला अध्यक्ष सुजाता पलांडे, शैलजा मोळक यांच्या नावाची चर्चा आहे. निष्ठावंत आणि नव्याने दाखल झालेल्या इच्छुकांनी मुख्यमंत्री देवेंद्र फडणवीस आणि प्रदेशाध्यक्ष चंद्रशेखर बावनकुळे यांच्याकडे मोर्चेबांधणी केली आहे. आमदार जगताप यांनाच पुन्हा संधी द्यावी, असे एका गटाचे म्हणणे आहे.

स्थानिक विरुद्ध बाहेरचे

सध्या शहरातील प्रमुख पदे स्थानिक नेत्यांच्या हातात आहेत. त्यामुळेा आता राज्याच्या विविध भागांतून शहरात आलेल्या निष्ठावंतांना संधी द्यावी, अशीही मागणी होत आहे. शहरात भाजपचे महेश लांडगे, शंकर जगताप, उमा खापरे, अमित गोरखे असे चार आमदार असून, ते कोणाचे नाव सुचवतात, हे पाहणे औत्सुक्याचे ठरले आहे.