तळेगावात ट्रक अपघातात तरुणी ठार

तळेगाव-चाकण राज्यमार्गावर तळेगाव स्टेशन येथील हरणेश्वर हॉस्पिटल कमानीजवळ गुरुवारी सायंकाळी सहाच्या सुमारास ट्रकच्या चाकाखाली सापडून झालेल्या अपघातात तरुणी जागीच ठार झाली.

तळेगाव दाभाडे : तळेगाव-चाकण राज्यमार्गावर तळेगाव स्टेशन येथील हरणेश्वर हॉस्पिटल कमानीजवळ गुरुवारी सायंकाळी सहाच्या सुमारास ट्रकच्या चाकाखाली सापडून झालेल्या अपघातात तरुणी जागीच ठार झाली.नेहा भूपेंद्र ओसवाल (वय २८, रा. जैन मंदिरासमोर, राजगुरुनगर, ता. खेड) असे या तरुणीचे नाव आहे. सहायक पोलीस निरीक्षक राजेंद्र पाटील यांनी दिलेल्या माहितीनुसार, नेहा वडगाव मावळ येथे माहेरी आली होती. ती अ‍ॅक्टिव्हा स्कूटरवरून (एमएच १४ डीई २१७१) तळेगाव स्टेशनच्या दिशेने जात असता, त्याच दिशेने जाणाऱ्या श्री अहिरेश्वर ट्रान्सपोर्ट कंपनीच्या ट्रकच्या (एमएच १२ एफझेड ४३८८) मागील चाकाखाली सापडल्याने त्या जागीच ठार झाल्या. ट्रकचालक सुनील धोंडिबा माने (वय ४७, रा. जोशीवाडी, शिरूर) याला पोलिसांनी ताब्यात घेतले असून, पुढील तपास पोलीस नाईक अजय पाटसकर करत आहेत. तळेगाव प्राथमिक आरोग्य केंद्रात शवविच्छेदन करून मृतदेह नातेवाइकांच्या ताब्यात देण्यात आला.तळेगाव-चाकण राज्यमार्गावर वडगाव ते तळेगाव दरम्यान मागील दोन महिन्यांत झालेल्या अपघातात दोन महिलांना आपले प्राण गमवावे लागले आहेत. तर, एका चालकाचाही मृत्यू झाला आहे. इतर तीन अपघातांमध्ये नशीब बलवत्तर असल्याने काहींचे प्राण वाचले आहेत. राज्यमार्ग कृती समिती, मावळ मित्र नागरी आंदोलन, ज्येष्ठ नागरिक संघ, व्यापारी संघटना आणि विविध पक्षांच्या वतीने या मार्गावरील धोकादायक वाहतुकीसंदर्भात वारंवार आंदोलने करण्यात आली. नगरपालिका, पोलीस आणि महसूल खात्याची संयुक्त बैठकही नगरपालिका सभागृहात घेण्यात आली. त्या वेळी नगराध्यक्ष, उपनगराध्यक्ष, ज्येष्ठ नगरसेवकांनी आवाज उठविला होता. (वार्ताहर)