शस्त्र बाळगणाऱ्या २२ वर्षीय तरुणाला ठोकल्या बेड्या; एका पिस्तुलासहित तीन काडतुसे जप्त

पिंपरीत भोसरी येथे रात्री ९ च्या सुमारास कारवाई करण्यात आली

ठळक मुद्देआरोपीकडून ३१ हजार ५०० रुपयांची शस्त्रे जप्त करण्यात आली

पिंपरी: विनापरवाना शस्त्र बाळगल्याप्रकरणी तरुणाला अटक करण्यात आली. त्याच्याकडून ३१ हजार ५०० रुपये किमतीचे एक पिस्तूल मॅक्झीनसह व तीन जिवंत काडतुसे जप्त केली आहेत. भोसरी येथे गुळवे वस्तीकडे जाणाऱ्या रस्त्याच्या कडेला मंगळवारी रात्री सव्वा नऊच्या सुमारास ही कारवाई करण्यात आली.

शशिकांत हनुमंत बॅगरी (वय २२, रा. आनंद नगर झोपडपट्टी, चिंचवड), असे अटक केलेल्या आरोपी तरुणाचे नाव आहे. पोलीस कर्मचारी सुमित देवकर यांनी याप्रकरणी भोसरी पोलीस ठाण्यात फिर्याद दिली आहे.

 पोलिसांनी दिलेल्या माहितीनुसार, आरोपीकडे विनापरवाना शस्त्र असल्याची माहिती मिळाली. त्यानुसार भोसरी पोलिसांनी कारवाई करून आरोपीला पकडले. त्याच्याकडून ३१ हजार ५०० रुपये किंमतीचे एक पिस्तूल मॅक्झिनसह तीन जिवंत काडतुसे जप्त केली.