WhatsApp Update : आता जो बोलणार, केवळ तोच दिसणार...व्हॉट्सअ‍ॅप कॉलवर आलंय नवं भन्नाट फीचर!

आता व्हॉट्सॲपने ग्रुप व्हिडिओ कॉलिंगचा अनुभव अधिक स्मार्ट आणि सोपा करण्यासाठी एक भन्नाट फीचर सादर केले आहे.

जगभरात सर्वाधिक वापरले जाणारे मेसेजिंग ॲप व्हॉट्सॲप आपल्या युजर्ससाठी सतत नवनवीन फीचर्स घेऊन येत असते. आता व्हॉट्सॲपने ग्रुप व्हिडिओ कॉलिंगचा अनुभव अधिक स्मार्ट आणि सोपा करण्यासाठी एक भन्नाट फीचर सादर केले आहे. या नवीन फीचरला 'डोमिनंट स्पीकर मोड' असे नाव देण्यात आले असून, यामुळे ग्रुप कॉल दरम्यान होणारा गोंधळ आता कायमचा मिटणार आहे.

अनेकदा मोठ्या ग्रुप कॉलमध्ये एकाच वेळी स्क्रीनवर अनेक लोकांचे व्हिडिओ विखुरलेले दिसतात. अशा वेळी नेमके कोण बोलत आहे, हे ओळखणे कठीण होते आणि युजर्सचे लक्ष विचलित होते. व्हॉट्सॲपच्या या नवीन अपडेटमुळे, ग्रुप कॉलमध्ये जो सदस्य बोलायला सुरुवात करेल, त्याचा व्हिडिओ आपोआप स्क्रीनवर सर्वात मुख्य आणि मोठ्या आकारात दिसेल.

म्हणजेच, 'जो बोलेल, तोच समोर दिसेल'. यामुळे संभाषणात स्पष्टता येईल आणि कोणाशी संवाद सुरू आहे हे समजणे सोपे होईल. केवळ डोमिनंट स्पीकरच नाही, तर व्हॉट्सॲपने कॉल दरम्यान स्क्रीनचा लेआउट बदलणेही आता अधिक सुलभ केले आहे.

युजर्स आपल्या आवडीनुसार आणि गरजेनुसार व्हिडिओ व्ह्यू ॲडजस्ट करू शकतात. ही प्रक्रिया इतकी सोपी ठेवण्यात आली आहे की, तांत्रिक माहिती नसलेली व्यक्तीही सहजपणे आपला कॉलिंग अनुभव पर्सनलाईज करू शकेल.

हे फीचर केवळ मित्र-मैत्रिणी किंवा नातेवाईकांशी गप्पा मारण्यासाठीच नाही, तर ऑफिस मीटिंग्स, ऑनलाइन क्लासेस आणि ग्रुप डिस्कशनसाठी अत्यंत उपयुक्त ठरणार आहे. विशेषतः प्रोफेशनल कॉल्समध्ये जिथे वक्त्याकडे सर्वांचे लक्ष असणे गरजेचे असते, तिथे हे 'डोमिनंट स्पीकर' फीचर गेमचेंजर ठरेल.

या बदलामुळे व्हॉट्सॲप ग्रुप कॉलिंग आता केवळ सोपेच नाही, तर अधिक शिस्तबद्ध आणि स्मार्ट झाले आहे. झूम किंवा गुगल मीटसारख्या मोठ्या प्लॅटफॉर्मवर असणारी ही सुविधा आता व्हॉट्सॲपवर आल्याने युजर्समध्ये उत्साहाचे वातावरण आहे. तुम्ही तुमचे व्हॉट्सॲप अपडेट केले नसेल, तर लगेच प्ले-स्टोअर किंवा ॲप-स्टोअरवर जाऊन अपडेट करा आणि या सुविधेचा आनंद घ्या.