आता फोनवर दिसणार कॉल करणाऱ्याचे 'आधार' कार्डवरील नाव; कसे काम करते CNAP?

तुमच्या मोबाईलवर एखाद्या अनोळखी नंबरवरून कॉल आला की, 'हा कॉल नक्की कोणाचा?' हा प्रश्न आता इतिहास जमा होणार आहे. टेलिकॉम रेग्युलेटरी अथॉरिटी ऑफ इंडियाने शिफारस केलेली CNAP (कॉलर नेम डिस्प्ले) ही सेवा आता देशातील अनेक टेलिकॉम सर्कल्समध्ये सुरू झाली आहे. यासाठी तुम्हाला कोणतेही थर्ड पार्टी ॲप डाऊनलोड करण्याची गरज नाही.

कॉलर नेम डिस्प्ले ही एक टेलिकॉम आधारित सेवा आहे. जेव्हा तुम्हाला कॉल येईल, तेव्हा तुमच्या स्क्रीनवर कॉल करणाऱ्या व्यक्तीचे तेच नाव दिसेल जे त्याच्या **'आधार कार्ड'**वर किंवा सिम कार्ड घेताना दिलेल्या केवायसी कागदपत्रांवर आहे. ट्रू कॉलर वर लोक स्वतःचे नाव बदलू शकतात किंवा चुकीचे नाव टाकू शकतात, पण CNAP मध्ये टेलिकॉम कंपन्यांकडे असलेल्या अधिकृत रेकॉर्डनुसार नाव दिसेल.

देशातील विविध कंपन्यांनी वेगवेगळ्या राज्यांमध्ये ही सेवा प्रायोगिक तत्त्वावर सुरू केली आहे. जिओने बिहार, राजस्थान, पंजाब, पश्चिम बंगाल, उत्तर प्रदेश (पूर्व आणि पश्चिम), हिमाचल प्रदेश या राज्यांत ही सेवा दिली आहे.

एअरटेलने महाराष्ट्र, गुजरात, मध्य प्रदेश, जम्मू-काश्मीरमध्ये सेवा सुरु केली आहे. तर वोडाफोन आयडियाकडून महाराष्ट्र आणि तामिळनाडूच्या काही भागात ही सेवा उपलब्ध आहे.

तुमच्या फोनवर ही सेवा सुरू आहे की नाही, हे तपासण्यासाठी तुमच्या डायल पॅडवरून *#31# हा कोड डायल करा. जर स्क्रीनवर 'Caller ID defaults to not restricted' असा मेसेज आला, तर तुमच्यासाठी ही सेवा सुरू झाली आहे असे समजावे.

ट्रू कॉलर लोकांच्या फोनमधील कॉन्टॅक्ट लिस्टवरून नाव उचलते, जे चुकीचे असू शकते. सीएनएपी मात्र सरकारी ओळखपत्रावर (आधार) आधारित नाव दाखवते.

तसेच ट्रू कॉलरवर तुम्ही नाव एडिट करू शकता किंवा माहिती डिलीट करू शकता. पण सीएनएपीमध्ये मात्र सिम कार्ड ज्याच्या नावावर आहे, त्याचेच नाव समोरच्याला दिसेल. सीएनएपी मुळे नाव कळणार असले तरी, स्पॅम कॉल्स पूर्णपणे थांबतील असे म्हणणे घाईचे ठरेल.

कारण सध्या जर तुमचा नंबर एअरटेलचा असेल आणि जिओवरून कॉल आला, तर नाव दिसण्यात तांत्रिक अडचणी येत आहेत. सर्व कंपन्यांनी एकमेकांचा डेटा शेअर केल्याशिवाय ही सेवा पूर्णपणे यशस्वी होणार नाही.

ट्रू कॉलर स्पॅम कॉल असेल तर स्क्रीन 'लाल' करून इशारा देते, तसा इशारा सध्या सीएनएपीमध्ये मिळत नाही. फक्त नाव दिसते.