India Pakistan War : भारताच्या प्रत्युत्तराच्या कारवाईमुळे पाकिस्तानमध्ये विध्वंस, आतापर्यंत काय-काय घडले; १० मुद्द्यांमध्ये समजून घ्या

India Pakistan War : बुधवारी रात्री पाकिस्तानने देशातील अनेक राज्यांवर क्षेपणास्त्रे आणि ड्रोनने हल्ला केला. भारतीय हवाई संरक्षण दलाने सर्व क्षेपणास्त्रे आणि ड्रोन नष्ट केले आहेत. दरम्यान, भारताने पाकिस्तानवर अनेक क्षेपणास्त्रे डागून प्रत्युत्तर दिले आहे.

'ऑपरेशन सिंदूर' नंतर पाकिस्तानने गुरुवारी रात्री राजस्थान, जम्मू आणि काश्मीर आणि पंजाबसह अनेक राज्यांवर क्षेपणास्त्र आणि ड्रोन हल्ले केले. भारतीय हवाई संरक्षण यंत्रणेने सर्व क्षेपणास्त्रे आणि ड्रोन अचूकपणे पाडले. यानंतर भारताने पाकिस्तानवर मोठा हल्ला केला.

गुरुवारी रात्री पाकिस्तानने जम्मू, पठाणकोट आणि जैसलमेरवर ड्रोन, क्षेपणास्त्रे आणि लढाऊ विमानांनी हल्ला केला, पण भारतीय हवाई संरक्षण प्रणाली S-400 आणि आकाशने तो उधळून लावला. पाकिस्तानची दोन चिनी बनावटीची JF-17, अमेरिकेची F-16 विमाने आणि AWACS त्यांच्याच हद्दीत पाडण्यात आली. ही तिन्ही विमाने भारतावर हल्ला करण्याच्या उद्देशाने फिरत होती.

यानंतर भारताने पाकिस्तानची राजधानी इस्लामाबाद, लाहोर, कराची, सियालकोट, बहावलपूर यासारख्या महत्त्वाच्या शहरांवर क्षेपणास्त्रे आणि ड्रोनचा वर्षाव केला. संध्याकाळी उशिरा झालेल्या हल्ल्यांनंतर, सीडीएसच्या नेतृत्वाखाली तिन्ही सैन्याच्या प्रमुखांची आपत्कालीन बैठक झाली. या बैठकीत पाकिस्तान विरुद्ध कठोर कारवाई करण्याचा निर्णय घेण्यात आल्याचे सांगण्यात येत आहे.

काल भारतीय नौदलानेही कारवाई सुरू केली. अरबी समुद्रात तैनात असलेल्या आयएनएस विक्रांतने कराचीला लक्ष्य केले. नौदलाच्या हल्ल्यामुळे कराची बंदरासह शहरात मोठ्या प्रमाणात आग लागली आहे. पाकिस्तानच्या कराची आणि ओरमारा बंदरांवर आयएनएस विक्रांतवरून अनेक क्षेपणास्त्रे डागण्यात आली आहेत. त्यामुळे दोन्ही बंदरांवर मोठी आग लागली.

भारताने प्रत्युत्तरादाखल केलेल्या हल्ल्यात पाकिस्तानचे AWACS विमान पाडले आहे. AWACS म्हणजे एअरबोर्न वॉर्निंग अँड कंट्रोल सिस्टीम. हे एक विमान आहे जे रडार आणि इतर सेन्सर्सने सुसज्ज आहे. ते विमाने, क्षेपणास्त्रे, जहाजे आणि वाहनांचा मागोवा घेते आणि कमांड सेंटरला त्यांची माहिती देते.

जम्मू-काश्मीरमधील उधमपूर, किश्तवार, अखनूर, सांबा, श्रीनगर आणि अनंतनाग तर राजस्थानमधील बारमेर, बिकानेर आणि श्री गंगानगर आणि पंजाबमधील चंदीगड, मोहाली, जालंधर, अमृतसर, होशियारपूर, गुरुदासपूर आणि पठाणकोट तसेच गुजरातमधील भुज, कच्छ या शहरांमधील पूर्ण वीजपुरवठा खंडित करण्यात आला.

पाकिस्तानमध्ये घबराट पसरली. यानंतर पाकिस्तानचे पंतप्रधान शाहबाज शरीफ यांनीही यासंदर्भात लष्कर आणि सुरक्षा संबंधित आपत्कालीन उच्चस्तरीय बैठक बोलावली. भारताने लाहोरसह त्यांच्या आठ शहरांच्या हवाई संरक्षण यंत्रणेवर हल्ला केल्याचे पाकिस्तान लष्कराने कबुल केले.

अमेरिकेच्या परराष्ट्र विभागाचे प्रवक्ते टॅमी ब्रूस यांनी म्हटले आहे की, या संपूर्ण परिस्थितीत कोणतीही वाढ रोखणे ही अमेरिकेची मुख्य प्राथमिकता आहे. हा मुद्दा अनेक दशकांपासून सुरू आहे आणि अलिकडच्या आठवड्यात घडलेल्या घटना, विशेषतः दहशतवादी हल्ल्यानंतर, आश्चर्यकारक नसतील, परंतु निश्चितच अत्यंत निराशाजनक होत्या.

जम्मू आणि काश्मीर प्रशासनाने खबरदारीचा उपाय म्हणून ९ आणि १० मे रोजी सर्व शैक्षणिक संस्था - शाळा, महाविद्यालये आणि विद्यापीठे बंद ठेवण्याचा निर्णय घेतला आहे. विद्यार्थी आणि कर्मचाऱ्यांची सुरक्षितता सुनिश्चित करण्यासाठी, सध्याची परिस्थिती आणि सुरक्षेची कारणे लक्षात घेऊन हा निर्णय घेण्यात आला आहे. प्रशासनाने नागरिकांना शांतता राखण्याचे आणि अधिकृत मार्गदर्शक तत्त्वांचे पालन करण्याचे आवाहन केले आहे.