कुणी केलं पेमेंट सिस्टमला लक्ष्य, तर कुणी चोरली कार्ड्सची माहिती! जगातील ५ मोठे सायबर हल्ले

भारत पाक संघर्षादरम्यान सीमेवर सुरू असणाऱ्या युद्धासोबतच सायबर हल्लेदेखील चर्चेत होते. या संघर्षादरम्यान पाककडून भारतीय वेबसाईट्सवर सायबर हल्ले करण्याचा प्रयत्न केला गेला होता. मात्र, हा प्रयत्न भारतीयांनी हाणून पाडला. सायबर हल्ल्याच्या प्रकरणात एटीएसने कारवाई करत दोन तरुणांना ताब्यात घेतलं आहे.

यानिमित्ताने जाणून घेऊया जगातील ५ सर्वात धोकादायक सायबर हल्ल्यांबद्दल, ज्यांनी सर्वांना हादरवून टाकले आणि त्याचा परिणामही नुकसानकारक होता. या सायबर हल्ल्यांशी संबंधित माहिती कोबाल्ट नावाच्या वेबसाईटच्या रिपोर्टवर आधारित आहे.

२००० मध्ये, एका किशोरवयीन मुलाने अमेरिकेच्या संरक्षण विभागावर तसेच नासावर सायबर हल्ला केला होता. त्याचा प्रभाव तब्बल २१ दिवस टिकला. या काळात हल्लेखोराने नासाकडून १.७ दशलक्ष डॉलर्सचे सॉफ्टवेअर डाउनलोड केले. इतका मोठा सायबर हल्ला केल्याबद्दल गुन्हेगाराला ६ महिने कोठडीत ठेवण्यात आले होते.

२००७ मध्ये, 'द आइसमन' म्हणून प्रसिद्ध असलेल्या मॅक्स बटलरने कार्डर्समार्केट नावाच्या वेबसाईटवर सायबर हल्ला केला आणि तब्बल २० लाख कार्डांची माहिती चोरली. याशिवाय ८७ दशलक्ष डॉलर्सची फसवणूकही केली. या कृत्याबद्दल, त्याला १४ वर्षांचा तुरुंगवास आणि ४ कोटी डॉलर्स दंडाची शिक्षा सुनावण्यात आली.

२००८ मध्ये, त्यावेळच्या जगातील ५ सर्वात मोठ्या कार्ड कंपन्यांपैकी एक असलेल्या हार्टलँड पेमेंट सिस्टम्सवर सायबर हल्ला झाला होता. या हल्ल्यात सुमारे १०० दशलक्ष कार्डची माहिती लीक झाली आणि ६५० हून अधिक वित्तीय कंपन्या देखील प्रभावित झाल्या. या हल्ल्यासाठी अल्बर्ट गोंझालेझ आणि दोन रशियन नागरिकांना दोषी ठरवण्यात आले.

२०१२ मध्ये सौदी अरेबियाची प्रमुख तेल कंपनी अरामकोवरही मोठा सायबर हल्ला झाला होता. या हल्ल्यात 'शामून' नावाचा व्हायरस वापरण्यात आला होता, ज्याचा एकमेव उद्देश डेटा नष्ट करणे होता. या विषाणूने कंपनीच्या सुमारे ३०,००० संगणकांचा डेटा डिलीट केला, ज्यामुळे कंपनीला उत्पादनात मोठा विलंब झाला. या हल्ल्याचा कंपनीच्या उत्पन्नावर फारसा परिणाम होऊ शकला नाही. अमेरिकेच्या गुप्तचर संस्थांनी या हल्ल्यामागे इराणचा हात असल्याचे म्हटले होते, परंतु इराणने ते नाकारले आणि येमेनला दोष दिला.

२०११ मध्ये, सोनीच्या प्लेस्टेशन नेटवर्कलाही एका मोठ्या सायबर हल्ल्याचा सामना करावा लागला होता, ज्यामुळे ७७ दशलक्ष वापरकर्त्यांची माहिती प्रभावित झाली होती. या हल्ल्यामुळे, कंपनीला २३ दिवसांसाठी त्यांची सेवा बंद करावी लागली आणि अंदाजे १७१ दशलक्ष डॉलर्सचे नुकसान झाले. हा हल्ला करणाऱ्या हल्लेखोराची ओळख पटू शकली नाही.