९० खाजगी जेट, ३० वॉटर टॅक्सी... पण लग्नपत्रिकेवरुन ट्रोल! बेझोस-सांचेझ यांच्या लग्नाची पत्रिका व्हायरल!

Jeff Bezos and Lauren Sanchez : जगातील तिसऱ्या क्रमांकाचे श्रीमंत व्यक्ती जेफ बेझोस आणि लॉरेन सांचेझ यांच्या लग्नाची सध्या जगभर चर्चा आहे. या शाही विवाह सोहळ्यासाठी पाण्यासारखा पैसा खर्च करण्यात येत आहे.

जगातील तिसऱ्या क्रमांकाचे श्रीमंत व्यक्ती जेफ बेझोस सध्या त्यांच्या लग्नामुळे खूप चर्चेत आहेत. ते त्यांची वाग्दत्त वधू लॉरेन सांचेझ यांच्याशी इटलीतील व्हेनिस शहरात शाही विवाह करणार आहेत. पण या हाय-प्रोफाइल लग्नाआधीच त्यांच्या लग्नाचे निमंत्रण कार्ड इंटरनेटवर व्हायरल झाले असून त्यावरून त्यांची खूप खिल्ली उडवली जात आहे.

कार्ड पाहिल्यानंतर सोशल मीडियावर अनेकांनी आश्चर्य व्यक्त केले. अनेक वापरकर्त्यांना कार्डची रचना खूपच साधी आणि सामान्य वाटली, ज्यामुळे त्याची खिल्ली उडवण्यात आली. एका वापरकर्त्याने विचारले, “हे कार्ड मायक्रोसॉफ्ट पेंटमध्ये बनवले आहे का?”

आणखी एका वापरकर्त्याने, “पैसे आहेत पण क्लास नाही!” अशी खिल्ली उडवली. अब्जाधीश बेझोस यांच्याकडून लोकांना खूप आकर्षक आणि सर्जनशील गोष्टीची अपेक्षा होती, पण या कार्डने त्यांना निराश केले.

जेफ बेझोस यांची वाग्दत्त वधू लॉरेन सांचेझ एक प्रसिद्ध पत्रकार आणि न्यूज अँकर आहे. तिने अमेरिकन टीव्हीवर खूप काम केले आहे आणि तिचा चेहरा खूप लोकप्रिय आहे. लॉरेन आणि बेझोस गेल्या सहा वर्षांपासून एकत्र आहेत.

रिपोर्ट्सनुसार, २०२३ मध्ये बेझोसने तिला सुमारे ३४ दशलक्ष डॉलर्स (जवळपास २५३० कोटी रुपये) किमतीची प्लॅटिनम डायमंड रिंग देऊन लग्नासाठी विचारले. आता त्यांचे लग्न चर्चेचा विषय बनले आहे.

बेझोसचे हे लग्न तीन दिवस चालणार आहे आणि यासाठी व्हेनिसमधील आलिशान हॉटेल्समध्ये शाही व्यवस्था करण्यात आली आहे. पाहुण्यांना लग्नाच्या ठिकाणी आणण्यासाठी ९० खाजगी जेट आणि ३० वॉटर टॅक्सींची खास सोय करण्यात आली आहे.

निमंत्रण पत्रिका साधी असली तरी, हे लग्न एका अब्जाधीशाकडून अपेक्षित असल्याप्रमाणे भव्य आणि संस्मरणीय सोहळा असणार आहे. ट्रोलिंग होऊनही या लग्नाची चर्चा जगभर होत आहे.