ITR फाईल करण्यासाठी १५ सप्टेंबरपर्यंतच संधी! अन्यथा भरावा लागेल इतक्या रुपयांपर्यंत दंड

ITR Filing 2024-25 : जर तुम्ही १५ सप्टेंबरपर्यंत आयटीआर दाखल करू शकत नसाल, तर तुम्ही उशिरा रिटर्न दाखल करू शकता. पण, यासाठी दंड भरावा लागेल.

जर तुम्ही आतापर्यंत तुमचा ITR (इन्कम टॅक्स रिटर्न) दाखल केला नसेल, तर तुमच्यासाठी ही बातमी अत्यंत महत्त्वाची आहे. आर्थिक वर्ष २०२४-२५ साठी आयकर रिटर्न भरण्याची अंतिम मुदत १५ सप्टेंबर २०२५ आहे.

जे करदाते अजूनही ITR दाखल करू शकले नाहीत, त्यांनी हे काम लवकर पूर्ण करणे आवश्यक आहे, कारण अंतिम मुदत चुकल्यास तुम्हाला दंड (पेनल्टी) भरावा लागू शकतो.

आयकर कायद्याच्या कलम १३९(४) नुसार, जर तुम्ही वेळेत ITR दाखल करू शकला नाही, तर तुम्ही नंतर बिलेटेड रिटर्न (उशिराने दाखल केलेला रिटर्न) भरू शकता. या वर्षी उशिराने रिटर्न भरण्याची अंतिम तारीख ३१ डिसेंबर २०२५ आहे. याचा अर्थ, १५ सप्टेंबरनंतरही तुम्हाला ITR भरण्यासाठी काही महिन्यांचा वेळ आहे, परंतु त्यासाठी तुम्हाला दंड भरावा लागेल.

आयकर कायद्याच्या कलम २३४F नुसार, जर तुम्ही उशिराने रिटर्न दाखल केला तर तुम्हाला दंड भरावा लागेल. दंडाची रक्कम तुमच्या करपात्र उत्पन्नावर अवलंबून असते.

जर तुमचे करपात्र उत्पन्न ५ लाख रुपयांपर्यंत किंवा त्याहून कमी असेल, तर कमाल दंडाची रक्कम १,००० रुपये आहे. जर तुमचे उत्पन्न ५ लाख रुपयांपेक्षा जास्त असेल, तर तुम्हाला ५,००० रुपयांपर्यंतचा दंड भरावा लागू शकतो. विशेष म्हणजे, तुमची कराची देयता कमी असो किंवा नसो, उशिराने रिटर्न दाखल केल्यास हा दंड भरावाच लागतो.

अंतिम मुदतीची वाट पाहणे योग्य नाही, कारण त्यामुळे दंडासोबतच तुमचा मानसिक ताणही वाढू शकतो. जर तुम्ही शेवटच्या दिवसांपर्यंत वाट पाहिली, तर तांत्रिक अडचणी वाढू शकतात, ज्यामुळे रिटर्न दाखल करण्यास आणखी उशीर होऊ शकतो. त्यामुळे, कोणत्याही प्रकारचा दंड किंवा त्रास टाळण्यासाठी शक्य तितक्या लवकर तुमचा ITR दाखल करणे हाच सर्वोत्तम मार्ग आहे.