आता जे होईल ते रेकॉर्डब्रेकच...! चांदीने ओलांडला ३.६ लाख रुपयांचा टप्पा; सोनेही निघाले २ लाखांकडे...

Gold Silver Price Today :

भारतीय सराफा बाजारात आज सोन्या आणि चांदीच्या किमतींनी सर्व जुने विक्रम मोडीत काढले आहेत. जागतिक घडामोडींच्या पार्श्वभूमीवर चांदीच्या किमतीत तब्बल ३०,००० रुपयांची ऐतिहासिक वाढ झाली आहे, तर सोन्यानेही १.५ लाखांचा टप्पा पार करून नवा उच्चांक गाठला आहे.

एमसीएक्सवर चांदीच्या किमतीत आज ९ टक्क्यांची तुफानी तेजी पाहायला मिळाली. मार्च एक्सपायरी असलेली चांदी ३०,१२२ रुपयांनी महाग होऊन ३,६४,८२१ रुपये प्रति किलोवर पोहोचली आहे.

इंडिया बुलियन अँड ज्वेलर्स असोसिएशननुसार, चांदीमध्ये २५,६०४ रुपयांची वाढ होऊन ती ३,४४,५६४ रुपये प्रति किलोवर ट्रेड करत आहे. विशेष म्हणजे, गेल्या केवळ एक महिन्यात चांदी १,१६,४५७ रुपयांनी महागली आहे.

सोन्याची दरवाढ

सोन्याच्या किमतीतही प्रति १० ग्रॅममागे सुमारे २,७०० ते ३,४०० रुपयांची वाढ झाली आहे.

२४ कॅरेट सोने: ३,४७३ रुपयांच्या वाढीसह १,५८,९०१ रुपये प्रति १० ग्रॅमवर पोहोचले आहे. (काही ठिकाणी हे दर १,५९,०२७ रुपयांपर्यंत गेले आहेत).

२२ कॅरेट सोने: या सोन्याचा भाव आता १,४५,५५३ रुपये प्रति १० ग्रॅम झाला आहे.

१८ कॅरेट सोने: दागिन्यांसाठी वापरल्या जाणाऱ्या १८ कॅरेट सोन्याचा भाव १,१९,१७६ रुपये प्रति १० ग्रॅमवर पोहोचला आहे.

वाढीचे मुख्य कारण

तज्ज्ञांच्या मते, जागतिक बाजारपेठेतील अस्थिरता आणि गुंतवणुकीचा सुरक्षित पर्याय म्हणून मौल्यवान धातूंकडे वळलेला ओघ यामुळे ही प्रचंड दरवाढ झाली आहे. गेल्या आठवड्यातील शुक्रवारीही दोन्ही धातूंनी विक्रम केले होते, मात्र आजची तेजी अभूतपूर्व मानली जात आहे.