By ऑनलाइन लोकमत | Updated: April 29, 2026 18:26 IST
1 / 7 कर्मचारी भविष्य निधीशी संबंधित महत्त्वाची घडामोड समोर आली आहे. भविष्य निर्वाह निधी संघटना (EPFO) अंतर्गत नोंदणीकृत कर्मचाऱ्यांना अधिक लाभ देण्यासाठी केंद्र सरकार विविध प्रस्तावांवर विचार करत आहे. विशेषतः EPS-९५ पेन्शन वाढवण्याबाबत चर्चा सुरू असल्याने लाखो कर्मचाऱ्यांना मोठा दिलासा मिळण्याची शक्यता आहे.2 / 7 सध्या EPS-९५ अंतर्गत किमान पेन्शन ₹१,००० इतकी आहे. मात्र कामगार संघटनांनी ही रक्कम वाढवून ₹७,५०० करण्याची मागणी केली आहे. हा प्रस्ताव मान्य झाल्यास पेन्शनमध्ये तब्बल ७.५ पट वाढ होऊ शकते. या मागणीला संसदीय समितीनेही पाठिंबा दिल्याचे समोर आले आहे, त्यामुळे या निर्णयाकडे सर्वांचे लक्ष लागले आहे.3 / 7दरम्यान, EPFO सदस्यांना PF खात्यावर मिळणारे ८.२५ टक्के व्याज लवकरच खात्यात जमा होण्याची शक्यता व्यक्त केली जात आहे. यासाठी अर्थ मंत्रालयाची अंतिम मंजुरी अपेक्षित असून, ती मिळाल्यानंतर रक्कम थेट खात्यात जमा केली जाईल. अंदाजानुसार, मे महिन्यात ही प्रक्रिया पूर्ण होऊ शकते.4 / 7तसेच EPFOकडून तांत्रिक सुधारणा करत सदस्यांसाठी आणखी सुविधा उपलब्ध करून देण्यावर भर दिला जात आहे. त्याचाच एक भाग म्हणून ATMद्वारे PF रक्कम काढण्याची सुविधा लवकरच सुरू होण्याची शक्यता आहे. ही सुविधा लागू झाल्यास सदस्यांना बँक अकाउंटप्रमाणेच ATM कार्डच्या माध्यमातून PFची रक्कम सहजपणे काढता येईल, ज्यामुळे निधीपर्यंत पोहोच अधिक सोपी होईल.5 / 7 EPFOने कार्यक्षमतेच्या बाबतीतही नवा विक्रम प्रस्थापित केला आहे. वित्त वर्ष २०२५-२६ मध्ये एकूण ८.३१ कोटी क्लेम सेटल करण्यात आले, जे मागील वर्षातील ६.०१ कोटी क्लेम्सच्या तुलनेत मोठी वाढ आहे. यापैकी ५.५१ कोटी क्लेम अॅडव्हान्स किंवा आंशिक विड्रॉलशी संबंधित होते. 6 / 7विशेष म्हणजे, ७१.११ टक्के अॅडव्हान्स क्लेम केवळ ३ दिवसांत निकाली काढण्यात आले, जे मागील वर्षी ५९.१९ टक्के होते. डिजिटल सुविधांमुळे ही प्रक्रिया अधिक वेगवान आणि सुलभ झाली आहे. एप्रिल २०२६मध्ये ६१.०३ लाख क्लेम सेटल झाले असून, त्यापैकी ९८.७० टक्के क्लेम २० दिवसांच्या आत निकाली काढण्यात आले.7 / 7 याचबरोबर EPFOने निष्क्रिय PF खाती सक्रिय करण्यासाठी E-PRAAPTI पोर्टलची सुरुवात केली आहे. या प्लॅटफॉर्मद्वारे आधार आधारित लॉगिनच्या मदतीने जुनी खाती जोडणे सुलभ होणार असून, UANशी लिंक नसलेली खातीही सक्रिय करता येणार आहेत. भविष्यात Member ID नसलेल्या वापरकर्त्यांनाही याचा लाभ मिळणार आहे.