ट्रम्प प्रशासनातून 'बाहेर', पण गरिबीतून अब्जाधीश होण्याचा त्यांचा प्रवास अचंबित करणारा! एका निर्णयाने डाव पलटला

Elon Musk Success Story : अमेरिकेच्या अध्यक्षीय निवडणुकीदरम्यान, डोनाल्ड ट्रम्प यांनी उघड पाठिंबा देणारे जगातील सर्वात श्रीमंत व्यक्ती इलॉन मस्क आता ट्रम्प सरकारमधून बाहेर पडले आहे. मात्र, इलॉन मस्क यांची इथपर्यंत पोहचण्याची गोष्ट प्रेरणादायी आहे.

अमेरिकेच्या अध्यक्षीय निवडणुकीदरम्यान जगातील सर्वात श्रीमंत व्यक्ती इलॉन मस्क (Elon Musk) यांनी डोनाल्ड ट्रम्प यांना उघडपणे पाठिंबा दिला होता. ट्रम्प यांनीही या मैत्रीचा मान राखत मस्क यांना आपल्या सरकारमध्ये महत्त्वाचा सल्लागार म्हणून स्थान दिलं. पण आता ही मैत्री फार काळ टिकली नाहीये.

इलॉन मस्क यांनी आता ट्रम्प प्रशासनातील आपली भूमिका सोडण्याचा निर्णय घेतला आहे. यामागचं कारण म्हणजे, सरकारी कामातील व्यस्त वेळापत्रकामुळे मस्क यांना त्यांच्या कंपन्यांवर, विशेषतः टेस्ला आणि स्पेसएक्सवर, पूर्ण लक्ष केंद्रित करता येत नव्हतं.

व्यवसायाने व्यापारी आणि स्वभावाने एक दूरदृष्टी असलेले अभियंता असलेले मस्क, नवीन गोष्टींचा शोध घेण्याच्या ध्यासासाठी ओळखले जातात. ४२८ अब्ज डॉलर्सचे मालक असलेल्या इलॉन मस्क यांच्या बँक खात्यात इतके पैसे आहेत की ते मोजायला अनेक वर्षे लागतील. पण, त्यांच्यासाठी पैसा हे यशाचं एकमेव गमक नाही, असं ते म्हणतात. त्यांच्या मते, दररोज सकाळी नवीन तांत्रिक समस्येवर उपाय शोधणं हेच खरं यश आहे.

आज जरी ते जगातील सर्वात श्रीमंत व्यक्ती असले तरी, हे यश त्यांना एका रात्रीत मिळालेलं नाही. एक काळ असा होता, जेव्हा त्यांना मित्रांकडून पैशांसाठी मदत मागावी लागली होती. त्यांचे वडील दिवाळखोर झाले होते आणि फी भरण्यासाठीही पैसे नव्हते. एका खोलीच्या घरात जमिनीवर झोपून त्यांनी अनेक रात्री काढल्या आहेत. ९० च्या दशकात त्यांचे वडील इरॉल मस्क यांना व्यवसायात मोठं नुकसान झालं आणि परिस्थिती दिवाळखोरीच्या उंबरठ्यावर पोहोचली होती.

वयाच्या १२ व्या वर्षी त्यांनी काम करायला सुरुवात केली. त्यांनी एक व्हिडिओ गेम बनवला आणि तो ५०० अमेरिकन डॉलर्सना विकून पहिला नफा कमावला. या पैशातून त्यांनी १९९५ मध्ये वेब सॉफ्टवेअर कंपनी 'झिप-२' (Zip-2) ची स्थापना केली, जी नंतर १९९९ मध्ये ३०७ दशलक्ष डॉलर्सना विकली गेली. येथूनच त्यांच्या व्यावसायिक जीवनाची खरी सुरुवात झाली. यानंतर त्यांनी टेस्ला (Tesla), स्पेसएक्स (SpaceX) सारख्या अनेक कंपन्या सुरू केल्या.

२००८ हे वर्ष इलॉन मस्कसाठी अत्यंत कठीण होते. त्यांची कंपनी टेस्ला दिवाळखोरीच्या उंबरठ्यावर पोहोचली होती. स्पेसएक्सचीही तीच परिस्थिती होती. टेस्ला दरमहा ४ दशलक्ष डॉलर्स खर्च करत होती, पण एकही कार विकू शकली नव्हती. टेस्लाचा 'रोडस्टर' प्रोटोटाइप ८९ वेळा अपयशी ठरला, बुकिंग रद्द होत होती आणि ग्राहकांना पैसे परत करण्यासाठीही त्यांच्याकडे पुरेसे पैसे नव्हते. कंपनी चालवण्यासाठी फक्त ३ आठवड्यांचा निधी शिल्लक होता आणि अभियंते दररोज कंपनी सोडून जात होते.

मस्क यांना स्वतःचं अस्तित्व संपताना दिसत होतं. पण, त्यांनी हार मानली नाही. ख्रिसमसच्या दिवशी त्यांनी तातडीने बोर्ड बैठक बोलावली आणि आपली शेवटची उरलेली २० दशलक्ष डॉलर्सची संपत्ती टेस्लामध्ये गुंतवण्याची घोषणा केली. मात्र, त्यांनी एक अट घातली की इतर गुंतवणूकदारांनाही तेवढीच रक्कम गुंतवावी लागेल. ही 'करो या मरो' अशी परिस्थिती होती.

गुंतवणूकदारांमध्ये गोंधळ होता, पण मस्कच्या आत्मविश्वासाने त्यांना जिंकले. गुंतवणूकदारांनी मस्कच्या २० दशलक्ष डॉलर्सशी बरोबरी केली आणि कंपनीत पैसे गुंतवले. मस्क यांच्या याच निर्णयामुळे टेस्ला केवळ वाचली नाही, तर ती आज जगातील सर्वात मौल्यवान ऑटोमोबाईल कंपनी बनली आहे. टेस्ला आणि स्पेसएक्ससारख्या कंपन्यांच्या बळावर, इलॉन मस्क आज जगातील सर्वात श्रीमंत व्यक्ती बनले आहेत, ज्यांना पराभूत करणे कोणालाही सोपे नाही.