मार्गशीर्ष अमावस्या २०२५: वर्षातली शेवटची आणि प्रभावशाली रात्र; आठवणीने करा 'हे' ५ उपाय!

Margashirsha Amavasya 2025: हिंदू धर्मात मार्गशीर्ष महिन्यातील अमावस्येला अनन्यसाधारण महत्त्व आहे. ही अमावस्या पितरांच्या कल्याणासाठी आणि पितृदोषापासून मुक्ती मिळवण्यासाठी अत्यंत शुभ मानली जाते. यंदा वर्षाच्या शेवटी येणाऱ्या या अमावस्येला काही विशेष उपाय केल्यास आयुष्यातील सर्व संकटे दूर होऊन सुख-समृद्धी प्राप्त होऊ शकते आणि नवीन वर्षाची मंगलमय सुरुवात होऊ शकते.

मार्गशीर्ष महिन्यात कडाक्याची थंडी असते, त्यामुळे या काळात केलेले दान आणि सेवा अधिक फलदायी ठरते. हे दान थेट पितरांना पोहोचते आणि त्यांचे आशीर्वाद मिळून पितृदोषातून मुक्ती मिळते. यंदा १९ डिसेंबर रोजी मार्गशीर्ष अमावस्या(Margashirsha Amavasya 2025) आहे. चला जाणून घेऊया पितरांना प्रसन्न करण्याचे ५ सोपे उपाय.

१. उबदार कपडे आणि अन्नाचे दान

मार्गशीर्ष महिन्यात थंडी जास्त असल्याने गरजू व्यक्तींना शाल, ब्लँकेट किंवा लोकरीचे कपडे दान करणे अत्यंत शुभ मानले जाते. हे दान नेहमी आपल्या पूर्वजांच्या नावाने करावे. यामुळे घरात शांतता नांदते आणि जीवनातील अडथळे दूर होतात. वस्त्रदानासोबतच अन्नदान करणेही श्रेष्ठ मानले गेले आहे.

२. पशू-पक्ष्यांना अन्न द्या

अशी मान्यता आहे की, आपले पितर पशू-पक्ष्यांच्या रूपात येऊन आपले भोजन ग्रहण करतात. अमावस्येच्या दिवशी कावळा, गाय आणि कुत्रा यांना अन्न खायला दिल्याने पितृदोष कमी होतो. पितरांच्या आशीर्वादाने रखडलेली कामे मार्गी लागतात.

३. पवित्र स्नान आणि तर्पण

अमावस्येच्या दिवशी एखाद्या पवित्र नदीत स्नान करण्याचे मोठे महत्त्व आहे. जर नदीवर जाणे शक्य नसेल, तर घरातील अंघोळीच्या पाण्यात थोडे गंगाजल टाकून स्नान करावे. स्नानानंतर पितरांच्या नावाने तर्पण (पाणी अर्पण करणे) करावे, ज्यामुळे त्यांना गती मिळते आणि ते आपल्यावर प्रसन्न होतात.

४. दक्षिण दिशेला मोहरीच्या तेलाचा दिवा

दक्षिण ही पितरांची दिशा मानली जाते. अमावस्येच्या रात्री घराच्या दक्षिण कोपऱ्यात किंवा दक्षिण दिशेला मोहरीच्या तेलाचा दिवा लावावा. यामुळे पितरांचा मार्ग सुकर होतो आणि घरामध्ये सकारात्मक ऊर्जा येते.

५. पिंपळाच्या झाडाची पूजा

पिंपळाच्या झाडामध्ये देवांचा आणि पितरांचा वास असतो असे मानले जाते. अमावस्येच्या संध्याकाळी पिंपळाच्या झाडाखाली दिवा लावावा आणि मनोभावे प्रार्थना करावी. शक्य असल्यास पिंपळाच्या झाडाला सात प्रदक्षिणा घालाव्यात. या उपायामुळे पितृदोषाचा प्रभाव मोठ्या प्रमाणात कमी होतो.

सदर माहिती सामान्य गृहीतके आणि ज्योतिषीय मान्यतांवर आधारित असून, यासंदर्भात तज्ज्ञ व्यक्तींचा सल्ला घेणे उपयुक्त ठरू शकेल.