गुरुपालट: ‘या’ ५ राशींवर होणार गुरुकृपा, अडचणी, समस्यांतून दिलासा; सुख, समृद्धीचा शुभ काळ!

गुरुपालट अतिशय महत्त्वाचा मानला जात असून, काही राशींना शुभ-लाभ मिळू शकतात, असे सांगितले जाते. जाणून घ्या...

नवग्रहांचा गुरु बृहस्पति म्हणजेच गुरु ग्रह स्वराशीतून म्हणजेच मीन राशीतून मेष राशीत प्रवेश करणार आहे. गुरुच्या राशीपरिवर्तनाला गुरुपालट म्हटले जाते. २१ एप्रिल रोजी गुरु राशीपरिवर्तन करणार आहे. नवग्रहांमध्ये गुरुला वरचे स्थान असल्यामुळे गुरुपालट अतिशय महत्त्वाचा मानला जात आहे. एका राशीत गुरु साधारणपणे १२ ते १३ महिने विराजमान असतो.

गुरुच्या मेष प्रवेशानंतर या राशीत पंचग्रही योग जुळून येत आहे. आताच्या घडीला मेष राशीत नवग्रहांचा राजा सूर्य, नवग्रहांचा राजकुमार बुध, छायाग्रह राहु आणि युरेनस आहेत. तर वृषभ राशीत शुक्र ग्रह विराजमान आहे. गुरुच्या प्रवेशानंतर पंचग्रही योग जुळून येईल. २२ एप्रिल २०२३ ते ३० एप्रिल २०२४ या कालावधीत गुरू मेष राशीत भ्रमण करणार आहे. १ मे २०२४ रोजी गुरू वृषभ राशीत प्रवेश करेल.

गुरु बृहस्पतीच्या राशी परिवर्तनाचा परिणाम सर्व १२ राशींवर होईल. गुरू बृहस्पती हा धनू आणि मीन राशीचा स्वामी आहे. कर्क ही त्यांची उच्च रास मानली जाते आणि मकर ही त्यांची नीच रास मानली जाते. तर मेष ही मित्र रास मानली जाते. मेष, सिंह, कन्या, तूळ आणि मीन राशीसाठी गुरूचे संक्रमण खूप शुभ ठरू शकेल, असे सांगितले जात आहे.

गुरुने मेष राशीत प्रवेश केल्यानंतर गुरु आणि राहु युतीचा गुरु चांडाळ योगही तयार होईल. गुरु हा सर्वात मोठा आणि शुभ ग्रह मानला जातो, सुख, वैभव, संपत्ती, संतती, विवाह, वैवाहिक जीवन यांचा कारक मानला जातो. कुंडलीत गुरु ग्रहाची स्थिती मजबूत असेल, कोणत्याही गोष्टींची कमतरता भासत नाही आणि नशीबही साथ देते, असे मानले जाते. गुरुचा शुभ-लाभ कोणत्या राशींना मिळू शकतो, ते जाणून घेऊया...

मेष राशीत गुरु विराजमान होत आहे. पुढील वर्षभर गुरु मेष राशीत असेल. या राशीच्या व्यक्तींना गुरुपालट अनुकूल ठरू शकेल. जीवनाच्या बहुतेक क्षेत्रांमध्ये शुभ परिणाम प्राप्त होऊ शकतील. पालकांचा आशीर्वाद मिळेल. त्यांच्या मदतीने अनेक कामे पूर्ण होतील. विद्यार्थ्यांना शैक्षणिक क्षेत्रात चांगले यश मिळू शकेल. सरकारी कामांत यश मिळू शकेल. वैवाहिक जीवनात नाते घट्ट होईल. नशिबाच्या पाठिंब्यामुळे सर्व कामे हळूहळू पूर्ण होऊ शकतील. भावंडांसोबतचे नातेही घट्ट होईल. नोकरदारांच्या उत्पन्नात वाढ होण्याची शक्यता आहे. करियरमध्ये नवीन संधी उपलब्ध होऊ शकतील.

सिंह राशीच्या व्यक्तींसाठी गुरुपालट शुभ परिणाम देणारा ठरू शकेल. कुटुंबातील सदस्यांसह धार्मिक स्थळांच्या यात्रेची शक्यता आहे. करिअरमध्ये चांगले यश मिळेल. अधिकाऱ्यांचे सहकार्य मिळाल्याने कामे पूर्ण करणे सोपे होऊ शकेल. भावंडे एकमेकांना मदत करताना दिसतील. प्रत्येकाला नात्याचे महत्त्व समजू शकेल. गुरु प्रभावामुळे व्यवसायात वाढ होऊ शकेल. विद्यार्थ्यांना शैक्षणिक क्षेत्रात येणारे अडथळे दूर होऊ शकतील.

कन्या राशीच्या व्यक्तींना गुरुपालट मोठे बदल घडवून आणणारा ठरू शकेल. व्यवसाय विस्ताराची योजना यशस्वी होऊ शकेल. आर्थिक बाबींमध्ये सुधारणा होऊ शकेल. नोकरदारांना खूप चांगली संधी मिळू शकते. करिअरमध्ये चांगली प्रगती होऊ शकेल. कौटुंबिक जीवनात सुख-शांती राहू शकेल. सुविधा वाढू शकतील. जीवनाच्या सर्व क्षेत्रात तुम्ही पुढे जाऊ शकाल.

तूळ राशीच्या व्यक्तींसाठी गुरुपालट शुभ ठरू शकेल. कौटुंबिक जीवन परिपूर्ण राहू शकेल. मुलांच्या प्रगतीने मन प्रसन्न राहू शकेल. घरगुती समस्या हळूहळू संपुष्टात येतील. परदेशात जाण्याची संधी मिळण्याची शक्यता आहे. सासरच्या लोकांशी संबंध दृढ होऊ शकतील. मालमत्ता किंवा वाहन खरेदी करु शकतात. अडकलेले पैसे मिळू शकतील. जोडीदारासोबतच्या नात्यात बळ येऊ शकेल. गुरूच्या प्रभावामुळे सरकारी कामातील अडथळे दूर होऊ शकतील. व्यवसायात प्रगती झाल्याने आर्थिक स्थितीही सुधारु शकेल.

मीन राशीतून गुरु मेष राशीत जात आहे. मीन राशीच्या व्यक्तींना गुरुपालट चांगले दिवस आणणारा ठरू शकेल. निर्णय क्षमता सुधारु शकेल. प्रवासामुळे मनोबल वाढू शकेल. संघर्षानंतर चांगले यश मिळू शकेल. नोकरदारांना कार्यालयातील सहकाऱ्यांचे सहकार्य मिळेल. अधिकाऱ्यांच्या सहकार्याने नवीन प्रकल्प पुढे नेण्यास मदत होईल. करिअरमध्ये चांगली प्रगती होऊ शकेल. तुमची प्रतिभा दाखवण्याची संधी मिळू शकेल. काही जणांना मोठी संपत्ती मिळू शकेल. - सदर माहिती सामान्य गृहितके आणि ज्योतिषीय मान्यतांवर आधारित असून, तुमच्या मूलांकाविषयी जाणून घेण्यासाठी तज्ज्ञ व्यक्तींचा सल्ला उपयुक्त ठरू शकेल, असे सांगितले जाते.