गंगाखेड: अपघातग्रस्त झालेल्या उसाच्या ट्रॉलीला धडकल्याने दुचाकीस्वार जागीच ठार झाल्याची घटना सोमवारी मध्यरात्री १२ वाजेच्या सुमारास परळी रस्त्यावरील वडगाव पाटीजवळ घडली. विठ्ठल गणपत लांडगे असे मृताचे नाव असून अपघातात त्याचा भाऊ जखमी झाला आहे.
सोनपेठ तालुक्यातील नैकोटा येथील विठ्ठल गणपत लांडगे ( ३२ ) व त्यांचा भाऊ अतुल गणपत लांडगे ( २६ ) हे दोघे भाऊ दुचाकीवरून ( क्रमांक एम एच २६ जे ५६१९ ) रात्री गंगाखेडकडे येत होते. गंगाखेड-परळी रस्त्यावरील वडगाव पाटीजवळ एक ट्रॉली अपघातग्रस्त झाली होती. मध्यरात्री १२ वाजेच्या दरम्यान त्यांना अंधारात त्यांना अपघातग्रस्त ट्रॉली दिसली नाही ते त्यावर धडकले. यात विठ्ठल गणपत लांडगे याचा जागीच मृत्यू झाला. तर अतुल गणपत लांडगे गंभीर जखमी आहे.
अपघाताची माहिती समजताच पोलीस निरीक्षक वसुंधरा बोरगावकर, सपोनि बालाजी गायकवाड, सपोउपनि टी. टी. शिंदे, जमादार बाबुराव घरजाळे आदी कर्मचाऱ्यांनी घटनास्थळी धाव घेतली. अतुल लांडगेस पोलिसांनी गंगाखेड उपजिल्हा रुग्णालयात दाखल केले. मृत विठ्ठल लांडगेचा मृतदेह आज सकाळी नातेवाईकांच्या स्वाधीन करण्यात आला. याप्रकरणी नातेवाईकांनी फिर्याद न दिल्याने दि. २ मार्च रोजी दुपारपर्यंत गुन्हा दाखल झाला नव्हता.