एमजेपीला पनवेल पालिकेची मदत

महाराष्ट्र जीवन प्राधिकरणाच्या जुनाट जलवाहिन्या बदलण्याकरिता सिडको, जेएनपीटीबरोबर पनवेल नगरपालिका सुध्दा हातभार लावणार आहे.

प्रशांत शेडगे, पनवेलमहाराष्ट्र जीवन प्राधिकरणाच्या जुनाट जलवाहिन्या बदलण्याकरिता सिडको, जेएनपीटीबरोबर पनवेल नगरपालिका सुध्दा हातभार लावणार आहे. पालिका प्रशासन याकरिता २८ कोटी निधी उपलब्ध करून देणार आहे. यामुळे शहराला सुरळीत पाणीपुरवठा होईल, असा विश्वास अधिकाऱ्यांनी व्यक्त केला आहे.जीवन प्राधिकरणाच्या भोकरपाडा येथील जवाहरलाल नेहरू जलशुध्दीकरण केंद्र ते जेएनपीटी व पनवेल या दरम्यान ३० वर्षांपूर्वी ११५ एमएलडी क्षमतेची जलवाहिनी टाकण्यात आली होती. या वाहिनीव्दारे पनवेल शहर, नवीन पनवेल, खांदा वसाहत, कळंबोली, कामोठे खारघर व आजूबाजूच्या १४ गावांतील सुमारे १५ लाख रहिवाशांना पाणीपुरवठा केला जातो. त्याचबरोबर पळस्पे फाटा येथून टी पॉइंट काढून जेएनपीटीलाही पाणी दिले जाते, आजूबाजूची गावेही यावर अवलंबून आहेत. परंतु ही वाहिनी अतिशय जुनाट होऊन ठिकठिकाणी गंजली आहे. परिणामी पाण्याच्या दाबाने ती वारंवार फुटत आहे, शिवाय सुमारे ३० किमी अंतर असलेल्या या जलवाहिनीलगत अनेक अनधिकृत झोपड्या तयार झाल्या आहेत. येथील झोपडपट्टीवासीय पाण्यासाठी अनेक ठिकाणी जलवाहिनी फोडत असल्याचे प्रकार उघडकीस आले आहेत. आसुडगाव, भिंगारी, पोदी, नवीन पनवेल, करंजाडे, वडघर, बंबईचा पाडा या ठिकाणी जलवाहिनी फोडली जात आहे. त्या ठिकाणा वारंवार मलमपट्टी केली तरी दुसऱ्या दिवशी जलवाहिनी फोडली जात आहे. पाणीगळती आणि चोरी प्रकरण रोखण्यासाठी या वाहिन्या बदलण्याचा प्रस्ताव शासन दरबारी अनेक वर्षांपासून धूळखात पडून आहे. मात्र या विभागाकडे निधी नसल्याने जुनाट वाहिन्यावरून तहान भागविली जात आहे. त्यामुळे जवळपास २५ टक्क्यापेक्षा जास्त पाणी गळती होत आहे.जलवाहिन्या बदलण्याकरिता एमजीपीने १९६ कोटींचा आराखडा तयार केला आहे. याकरिता सिडको १४४, पनवेल नगरपालिका २८, जेएनपीटी ४६ कोटी निधी देणार आहे. तसा करारनामासुध्दा तयार केला आहे. नगरपालिकेला अमृत योजनेंतर्गत निधी मिळणार आहे. ५० टक्के केंद्र शासन आणि प्रत्येकी २५ टक्के राज्य शासन व पनवेल नगरपालिका निधी देणार असल्याचे मुख्याधिकारी मंगेश चितळे म्हणाले.