एकीला लुटून दुसरीचा भरायचा हप्ता! इस्रोचा शास्त्रज्ञ बनून लुटणाऱ्या भामट्याला अटक, जुना इतिहास समोर

नवी मुंबई पोलिसांनी उच्च शिक्षित तरुणींना लुटणाऱ्या एका भामट्याला अटक केली आहे.

Navi Mumbai Crime: स्वतःला भारतीय अंतराळ संशोधन संस्थेचा शास्त्रज्ञ आणि सार्वजनिक बांधकाम विभागाचा अधिकारी भासवून उच्चशिक्षित महिलांची फसवणूक करणाऱ्या एका ३४ वर्षीय भामट्याला नवी मुंबई पोलीस गुन्हे शाखेने अटक केली. आदर्श प्रशांत म्हात्रे असे या आरोपीचे नाव असून, त्याने लग्नाचे आमिष दाखवून किमान सहा महिलांना तब्बल ८९.४० लाख रुपयांचा गंडा घातला आहे.

बनावट ओळखपत्र आणि आलिशान जीवनशैली

अलिबागचा रहिवासी असलेला आदर्श म्हात्रे Shaadi.com, Bharat Matrimony आणि Jeevansathi.com सारख्या प्रसिद्ध मॅट्रिमोनिअल साईट्सवर सक्रिय होता. स्वतःची विश्वासार्हता निर्माण करण्यासाठी त्याने इस्रो आणि पीडब्ल्यूडीची बनावट ओळखपत्रे तयार केली होती. पाचतारांकित हॉटेल्समधील मुक्काम आणि आलिशान जीवनशैलीचे फोटो अपलोड करून तो डॉक्टर आणि इंजिनिअर सारख्या उच्चशिक्षित महिलांना आपल्या जाळ्यात ओढत असे.

फसवणुकीची अजब पद्धत

पोलिसांनी दिलेल्या माहितीनुसार, म्हात्रे महिलांशी जवळीक साधून लग्नाचे स्वप्न दाखवायचा. त्यानंतर, आपल्या घरासाठी किंवा चांगल्या प्रॉपर्टी गुंतवणुकीसाठी प्री-अप्रूव्ड वैयक्तिक कर्ज काढण्यासाठी तो महिलांवर दबाव टाकायचा. कर्जाची रक्कम स्वतःच्या खात्यावर वळवून घेतल्यानंतर तो महिलांचे लैंगिक शोषण करायचा आणि त्यानंतर अचानक गायब व्हायचा.

एका पीडितेकडून घेतलेल्या पैशातून तो दुसऱ्या पीडितेच्या कर्जाचा हप्ता भरायचा, जेणेकरून कोणाला संशय येऊ नये आणि त्याला आपला गोरखधंदा सुरू ठेवता यावा. लुटलेल्या पैशांचा वापर तो गोव्यातील कॅसिनो आणि मौजमजेसाठी करत असे.

गुन्हेगारी इतिहास आणि अटक

ऑगस्ट २०२५ मध्ये रबाळे पोलीस ठाण्यात दाखल झालेल्या एका तक्रारीनंतर गुन्हे शाखेने या प्रकरणाचा समांतर तपास सुरू केला. तांत्रिक तपासाअंती पोलिसांनी २० फेब्रुवारी रोजी म्हात्रेला बेड्या ठोकल्या. न्यायालयाने त्याला ४ मार्चपर्यंत पोलीस कोठडी सुनावली आहे. नवी मुंबई, ठाणे, मुंबई आणि पुणे येथे त्याच्याविरुद्ध किमान ६ गुन्हे दाखल आहेत. म्हात्रेवर २०१९ पासून फसवणूक, बनावट कागदपत्रे तयार करणे आणि विनयभंगाचे अनेक गुन्हे दाखल आहेत.