वंदे भारत एक्सप्रेस रुळावरून घसरण्याचा कट! रुळांवर लाकूड ठेवल्याचे आढळले; मोठा अपघात टळला

रायबरेलीमध्ये वंदे भारत एक्सप्रेस जाण्यापूर्वी रेल्वे ट्रॅकवर एक मोठे लाकूड आढळल्याने खळबळ उडाली. स्थानिकांनी ते लाकूड बाजूला केल्याने मोठी रेल्वे दुर्घटना टळली.

उत्तर प्रदेशातील रायबरेली येथून एक मोठी बातमी समोर आली आहे. स्थानिकांच्या सतर्कतेमुळे मोठा रेल्वेअपघात टळला. रविवारी शहरातील सिव्हिल लाईन्स परिसरातील रायबरेली आणि दरियापूर रेल्वे स्थानकांदरम्यान वंदे भारत एक्सप्रेस ट्रेन जाण्यापूर्वी रेल्वे ट्रॅकवर मोठे लाकूड पडलेले आढळल्याने गोंधळ उडाला.

सुदैवाने, स्थानिक रहिवाशांना ते वेळीच लक्षात आले आणि त्यांनी लाकडी फळी रुळावरून काढून टाकली, यामुळे मोठा रेल्वे अपघात टळला.

धक्कादायक! ट्रंप यांची व्हेनेझुएलावर दुसऱ्या हल्ल्याची धमकी; आता कोलंबियाही रडारवर, दक्षिण अमेरिकेत युद्धाचे ढग?

सकाळी काही लोक रेल्वे ट्रॅकवरून जात असताना त्यांना लाकडी फळी रुळावर पडलेली दिसली. त्यावेळी प्रयागराजला जाणारी वंदे भारत एक्सप्रेस जाण्याची वेळ जवळ आली होती. धोका ओळखून स्थानिक रहिवाशांनी तात्काळ फळी काढून रेल्वे संरक्षण दलाला कळवले.

या घटनेनंतर परिसरात विविध चर्चा सुरू झाल्या. हे काही खोडसाळ घटकांचे काम असू शकते. कोणीतही जाणूनबुजून रुळांवर लाकडी फळी ठेवली असावी असे मत स्थानिकांचे आहे.

जर ते वेळीच काढून टाकले नसते तर मोठी दुर्घटना घडली असती, कारण रुळांवर कोणताही अडथळा वंदे भारत एक्सप्रेससारख्या हाय-स्पीड ट्रेनला गंभीर धोका निर्माण करू शकतो. या संदर्भात, आरपीएफ पोस्ट इन्चार्ज इन्स्पेक्टर ए.के. सिंह यांनी सांगितले की, रेल्वे रुळांवर लाकडी फळी लावल्याची त्यांना सध्या माहिती नाही.

माहिती मिळाल्यानंतर, तपास सुरू आहे. रुळांवर लाकडी फळी कशी आणि कोणी लावली हे शोधण्यासाठी आजूबाजूच्या परिसरात बसवलेल्या सीसीटीव्ही कॅमेऱ्यांची देखील तपासणी केली जाऊ शकते.