शिक्षकांनो, सोशल मीडियावर पोस्ट पडेल महागात, सीबीएसईचा इशारा; १०वी, १२वीच्या उत्तरपत्रिका तपासणाऱ्यांसाठी नियमावली

 सीबीएसईचे परीक्षा नियंत्रक संयम भारद्वाज यांनी सांगितले की, काही परीक्षक सोशल मीडियावर मूल्यमापन प्रक्रियेबाबत चुकीची आणि दिशाभूल करणारी माहिती पोस्ट करत असल्याचे बोर्डाच्या निदर्शनास आले आहे. 

नवी दिल्ली : केंद्रीय माध्यमिक शिक्षण मंडळाने दहावी आणि बारावीच्या उत्तरपत्रिका तपासणाऱ्या परीक्षकांसाठी कडक नियमावली जारी केली आहे. मूल्यमापन प्रक्रियेतील कोणतीही गोपनीय माहिती, अनुभव किंवा मते सोशल मीडियावर शेअर केल्यास संबंधितांवर कठोर कायदेशीर आणि शिस्तभंगविषयक कारवाई केली जाईल, असा इशारा बोर्डाने सोमवारी दिला आहे.

 सीबीएसईचे परीक्षा नियंत्रक संयम भारद्वाज यांनी सांगितले की, काही परीक्षक सोशल मीडियावर मूल्यमापन प्रक्रियेबाबत चुकीची आणि दिशाभूल करणारी माहिती पोस्ट करत असल्याचे बोर्डाच्या निदर्शनास आले आहे. 

अफवा पसरू शकतात शिक्षकांच्या पोस्टमुळे विद्यार्थी, पालक आणि इतर घटकांमध्ये संभ्रम निर्माण होऊन अफवा पसरण्याची शक्यता असते. सीबीएसईची उत्तरपत्रिका तपासणी प्रक्रिया ही अत्यंत गोपनीय असून ती कठोर नियमांच्या अधीन आहे. त्यामुळे सोशल मीडियावर याबद्दल भाष्य करणे हे व्यावसायिक आचरणाचे उल्लंघन मानले जाईल. नियमांचे उल्लंघन करणाऱ्यांवर कडक कारवाई करण्याचा इशाराही देण्यात आला आहे.

अफवा पसरवण्याचे २० प्रकार उघडसध्या सुरू असलेल्या सीबीएसई दहावी आणि बारावीच्या बोर्ड परीक्षांच्या काळात चुकीची माहिती आणि अफवा पसरवण्याचे किमान २० प्रकार समोर आले असून, याप्रकरणी कडक पावले उचलण्यात आली असल्याची माहिती केंद्रीय शिक्षण राज्यमंत्री जयंत चौधरी यांनी सोमवारी लोकसभेत दिली.

अफवा पसरवणारे व्हिडिओ संबंधित सोशल मीडियावरून तातडीने हटवण्यात आले आहेत. बनावट बातम्या रोखण्यासाठी सीबीएसई बोर्ड 'सर्ट-इन' आणि सायबर गुन्हे समन्वय केंद्रासोबत सातत्याने संपर्कात असून सोशल मीडियावरील हालचालींवर लक्ष ठेवण्यासाठी विशेष पथकही तैनात करण्यात आले आहे.