विमान कर्मचारी वेळापत्रकात आढळल्या गंभीर त्रुटी, एअर इंडियाच्या तीन अधिकाऱ्यांवर कारवाईचे आदेश

Air India News: एअर इंडियाच्या एका विभागीय उपाध्यक्षाचाही समावेश आहे. तसेच तिघांविरोधात त्वरित शिस्तभंगाची कारवाई सुरू करण्याचे आदेशही दिले.

मुंबई : विमानातील कर्मचाऱ्यांच्या कामाच्या वेळापत्रकातील गंभीर त्रुटींवर बोट ठेवत हे काम एअर इंडियाच्या तीन अधिकाऱ्यांकडून त्वरित काढून घेण्याचे आदेश नागरी हवाई वाहतूक महासंचालनालयाने (डीजीसीए) दिले आहे. त्यामध्ये या कंपनीच्या एका विभागीय उपाध्यक्षाचाही समावेश आहे. तसेच तिघांविरोधात त्वरित शिस्तभंगाची कारवाई सुरू करण्याचे आदेशही दिले.

डीजीसीएने २० जून रोजी हा आदेश जारी केला. त्याबाबत एअर इंडियाने शनिवारी म्हटले की, आम्ही आदेशाची अंमलबजावणी सुरू केली आहे. आता एअर इंडियाच्या चीफ ऑपरेशन्स ऑफिसरच्या देखरेखीखाली इंटिग्रेटेड ऑपरेशन्स कंट्रोल सेंटरचे (आयओसीसी) कामकाज चालेल. आम्ही सुरक्षाविषयक नियम व कार्यपद्धतीचे काटेकोर पालन करत आहोत. 

डीजीसीएने म्हटले की, लायसन्सिंग, विश्रांतीच्या वेळा तसेच उड्डाणाच्या अनुभवासंदतील निकष या गोष्टींबाबत कर्मचारीवर्गाच्या कामाच्या वेळापत्रकात गंभीर त्रुटी आढळल्या. उड्डाणाचे व्यवस्थापन, कर्मचाऱ्यांचे वेळापत्रक अशा गोष्टींवर एअर रुट मॅनेजमेंट सिस्टीम (आर्म्स) या सॉफ्टवेअर प्रणालीद्वारे बारीक लक्ष ठेवण्यात येते. त्यातूनच या त्रुटी लक्षात आल्या. 

१२ जून रोजी अहमदाबाद येथून लंडनला जाणाऱ्या एअर इंडियाच्या बोईंग ७८७-८ ड्रीमलायनर विमानाने उड्डाण केल्यानंतर ते काही क्षणांतच कोसळले. त्यातील २४२ जणांपैकी एक जण बचावला व बाकीचे सर्व ठार झाले. एअर इंडियाकडून सध्या सर्व ड्रीमलायनर विमानांची तपासणी सुरू आहे.

एअर इंडियाला धाडली कारणे दाखवा नोटीस

विमान कर्मचाऱ्यांच्या कामाचे वेळापत्रक तयार करण्याबद्दलच्या नियमांचे उल्लंघन केल्याप्रकरणी डीजीसीएने एअर इंडियाला कारणे दाखवा नोटीस बजावली होती. 

१६ व १७ मे २०२५ रोजी बंगळुरूहून लंडनकडे जाणाऱ्या एआय १३३ विमानाच्या उड्डाणांसंदर्भात अचानक तपासणी करण्यात आली. 

या उड्डाणांमध्ये चालक दलाने काम करावयाच्या १० तासांच्या मर्यादेचा भंग करण्यात आला होता असे आढळून आले. त्यामुळे एअर इंडियाकडून स्पष्टीकरण मागविले.

...तर एअर इंडियावर घातले जाऊ शकतात निर्बंध 

अशा प्रकारांना जबाबदार असलेल्या अधिकाऱ्यांवर कडक कारवाई करण्यात यावी, असा आदेश डीजीसीएने एअर इंडियाला दिला. त्याचप्रमाणे अशा प्रकारच्या चुका भविष्यात पुन्हा झालेल्या आढळल्यास एअरलाइन्सचा परवाना स्थगित करणे, विमान संचालनावर निर्बंध घालण्याचा आदेश एअर इंडियाविरोधात दिला जाऊ शकतो, असा इशाराही डीजीसीएने दिला.