ऑनलाइन लोकमत
नवी दिल्ली, दि. ११ - संरक्षण क्षेत्रात भारतासमोर अनेक पर्याय उपलब्ध झाले असले तरी गेल्या कित्येक दशकांपासून भारताचा प्रमुख भागीदार असलेला रशिया यापुढेही संरक्षण क्षेत्रात महत्वाची भूमिका बजावेल आहे, असे पंतप्रधान नरेंद्र मोदींनी सांगितले. भारत-रशिया द्विपक्षीय संबंध आणखी दृढ करण्याच्या इराद्याने पंतप्रधान नरेंद्र मोदी आणि रशियाचे राष्ट्राध्यक्ष व्लादिमीर पुतीन यांच्यात आज वार्षिक शिखर बैठक पार पडली.
या बैठकीदरम्यान दोन्ही देशांदरम्यान अणुउर्जा, तेल व वायू, सैन्यदल प्रशिक्षण यांच्यासह १६ करारांवर स्वाक्ष-या झाल्या.
रशियाने भारतात अत्याधुनिक हेलिकॉप्टर बनवणारा कारखाना उभारण्याचा निर्णय घेतला आहे असे मोदींनी सांगितले. तसेच रशियाच्या साथीने भारतात दहाहून अधिक अणुउर्जा निर्मिती प्रकल्प उभारण्यात येणार आहेत, असेही ते म्हणाले.
दहशतवाद व उग्रवाद यांच्याशी लढणे ही आमची प्राथमिकता असल्याचे मत मोदींनी यावेळी व्यक्त केले. मेक इन इंडिया मोहिमेस रशियाचा पाठिंबा असल्याचे सांगत या मोहिमेला मजबूती मिळेल असेही ते म्हणाले. दोन्ही देशांमधील सहकार्य व एक-दुस-याच्या हितासाठी असलेली मजबूत संवेदनशीलता ही दोन्ही देशांसाठी ताकद ठरेल, असेही ते म्हणाले.