राहुल गांधींकडून एपस्टाईन फाईल्सचा मुद्दा लोकसभेत, अनिल अंबानींसह 'या' मंत्र्याचं नाव घेत सरकारला घेरले

Rahul Gandhi News: लोकसभेमध्ये आज केंद्रीय अर्थसंकल्पावर झालेल्या चर्चेवेळी काँग्रेसचे ज्येष्ठ नेते आणि लोकसभेतील विरोधी पक्षनेते राहुल गांधी यांनी घणाघाती भाषण करत केंद्र सरकारची चौफेर कोंडी केली. यावेळी राहुल गांधी यांनी जगभरात गाजत असलेल्या एपस्टाईन फाईल्सचा मुद्दाही लोकसभेत उपस्थित केला.

लोकसभेमध्ये आज केंद्रीय अर्थसंकल्पावर झालेल्या चर्चेवेळी काँग्रेसचे ज्येष्ठ नेते आणि लोकसभेतील विरोधी पक्षनेते राहुल गांधी यांनी घणाघाती भाषण करत केंद्र सरकारची चौफेर कोंडी केली. यावेळी राहुल गांधी यांनी जगभरात गाजत असलेल्या एपस्टाईन फाईल्सचा मुद्दाही लोकसभेत उपस्थित केला. तसेच एपस्टाईन फाईल्समध्ये नाव आलं असल्याचा दावा करण्यात येत असलेले उद्योगपती अनिल अंबानी आणि केंद्रीय मंत्री हरदीप सिंग पुरी यांचं नाव घेत सरकारवर प्रश्नांची बरसात केली.

यावेळी राहुल गांधी म्हणाले की, अनिल अंबानी नावाचे एक उद्योगपती आहेत. माझा प्रश्न आहे की ते अद्याप तुरुंगात का गेलेले नाहीत. याचं कारण आहे हे म्हणजे एपस्टाईन फाईल्स. त्याबरोबरच मला केंद्रीय मंत्री हरदीप सिंह पुरी यांनाही विचारायचं आहे की, त्यांची एपस्टाईनशी ओळख कुणी करून दिली. हरदीप सिंग पुरी यांची एपस्टाईन याच्याशी ओळख कुणी करून दिली याची माहिती माझ्याकडे आहे आणि ते पुरी यांनाही माहिती आहे, असा दावाही राहुल गांधी यांनी केला. दरम्यान, राहुल गांधी यांच्या या आरोपांना सत्ताधारी बाकावरील सदस्यांनी तीव्र आक्षेप घेतला.

#WATCH | In the Parliament, Lok Sabha LoP and Congress MP Rahul Gandhi says, "There is a businessman Anil Ambani, I want to ask why is he not in jail? The reason is that his name is in the Epstein Files. I would also like to ask Hardeep Puri, who introduced him to Epstein. I know… pic.twitter.com/gIXqraRSIC

— ANI (@ANI) February 11, 2026

दरम्यान, एपस्टाईन फाईलवरून राहुल गांधी यांनी पंतप्रधान नरेंद्र मोदी यांच्यावरही निशाणा साधला. ते म्हणाले की, मला पंतप्रधानांच्या डोळ्यांत भीती दिसत आहे. त्याची दोन कारणं आहेत. त्यातील एक कारण म्हणजे एपस्टाईन. राहुल गांधी यांनी केलेल्या या उल्लेखानंतर पीठासीन अधिकाऱ्यांनी त्यांना ताकिद दिली.  मात्र राहुल गांधी थांबले नाहीत. ते पुढे म्हणाले की, केंद्राच्या संरक्षण क्षेत्रासाठीच्या  अर्थसंकल्पावर कुणाचं तरी नियंत्रण दिसतंय आणि ते आहेत मिस्टर अदानी. अदानी एक सर्वसामान्य उद्योगपती नाहीत. तसेच त्यांची कंपनीही सर्वसामान्य नाही. त्यांच्या कंपनीवर अमेरिकेमध्ये एक खटला दाखल झालेला आहे. तसेच त्यांचं लक्ष्य अदानी नव्हे तर पंतप्रधान आहेत. ही कंपनी भाजपाचा आर्थिक आधार आहे, असा आरोपही राहुल गांधी यांनी केला.