बेंच खरेदीवरून लोकप्रतिनिधींकडून प्रशासनाची कोंडी

ई-निविदा प्रक्रियेवरच ठेवले बोटनाशिक : जिल्हा परिषदेच्या समाजकल्याण विभागामार्फत करण्यात येणार्‍या दोन कोटींच्या बेंच खरेदीबाबत काही पदाधिकारी व सदस्यांनी शंका उपस्थित करीत प्रशासनाकडे याबाबत तक्रार केल्याचे कळते. येत्या सर्वसाधारण सभेतही याच विषयावर वादळी चर्चा होण्याची शक्यता काही लोकप्रतिनिधींनी व्यक्त केली आहे.दरम्यान, या दोन कोेटींच्या बेंच खरेदीबाबत राबविण्यात आलेल्या ई-निविदा प्रक्रियेवरच काही पदाधिकारी व सदस्यांनी शंका घेतली असून, ठराविक पुरवठादाराला अधिक सोयीच्या अटी-शर्ती टाकण्यात आल्याचा आरोप प्रशासनाकडे केल्याचे समजते.विशेष म्हणजे ही बेंच खरेदी आधीपासूनच वादाच्या भोवर्‍यात असून, ही आधी दर-कराराप्रमाणे की ई-निविदा पद्धतीने राबवायची यावरून प्रशासन व लोकप्रतिनिधी यामध्ये मतभेद होते. नुकत्याच झालेल्या सर्वसाधारण सभेत या बेंच खरेदीला मान्यता देण्यात आली होती. नाशिक व औरंगाबाद येथील मक्तेदारांमध्ये या बेंचचा पुरवठा करण्यावरून स्पर्धा लागल्यानेही दरकरार की ई-निविदा हा प्रश्न त्यावेळी उपस्थित करण्यात आला होता. आता तर दोन कोटी रुपयांच्या बेंच खरेदीवर काही पदाधिकारी व सदस्यांनी आक्षेप घेत ई-निविदा पद्धत राबविण्यावरच शंका उपस्थित करीत ही बेंच खरेदी रद्द करून नव्याने राबविण्यात यावी, यासाठी काही पदाधिकारी व सदस्यांनी जिल्हा परिषदेच्या एका वरिष्ठ अधिकार्‍याकडे याबाबत काल (दि.१९) सायंकाळी तक्रार केल्याचे कळते. (प्रतिनिधी)