"इतक्या गोळ्या मारेन की घरचे ओळखणार नाहीत"; पेट्रोल पंपावर तरुणीने कर्मचाऱ्याच्या छातीवर रोखले रिव्हॉल्व्हर

उत्तर प्रदेशात एका तरुणीने पेट्रोल पंपाच्या कर्मचाऱ्यावर पिस्तुल रोखल्याचा प्रकार समोर आला आहे.

UP Crime: गेल्या काही काळापासून समाजातील लोकांकडून वाढत्या संतापामुळे काही चिंताजनक घटना घडल्याचे समोर आलं आहे. संतापाच्या भरात संयम गमावल्यामुळे हत्याकांडासारख्या घटना देखील घडल्या आहेत. अशातच उत्तर प्रदेशातून एक धक्कादायक बातमी समोर आली आहे. एका तरुणीचा पेट्रोल पंपावरील कर्मचाऱ्याच्या छातीवर रिव्हॉल्व्हर रोखण्याचा व्हिडिओ सोशल मीडियावर व्हायरल होत आहे. व्हिडिओमध्ये ती तरुणी पेट्रोल पंपाच्या कर्मचाऱ्याला धमकावताना दिसत आहे. मात्र हे धमकावणे तरुणीला आणि तिच्या वडिलांना महागात पडलं आहे. पोलिसांनी दोघांनाही ताब्यात घेत रिव्हॉल्व्हर जप्त केले आहे.

उत्तर प्रदेशातील हरदोईमध्ये एक तरुणी सीएनजी पंपावर काम करणाऱ्या कर्मचाऱ्यावर रिव्हॉल्व्हर रोखताना दिसत आहे. सीएनजी पंपावर कारमधून जाणाऱ्या एका कुटुंबात आणि सीएनजी पंपावरील कर्मचाऱ्यामध्ये झालेल्या वादानंतर हा प्रकार घडला. वादादरम्यान तरुणीने कर्मचाऱ्याच्या छातीवर रिव्हॉल्व्हर रोखली आणि त्याला थेट धमकावले. या प्रकरणात तक्रार दाखल झाल्यानंतर पोलिसांनी कारमध्ये प्रवास करणाऱ्या तिन्ही आरोपींना ताब्यात घेतले आहे.

बिलग्राम परिसरातील सांडी रोडवर हे पेट्रोल पंप आहे. रविवारी संध्याकाळी ६ वाजता एहसान खान हे त्यांची पत्नी हुस्नबानो आणि मुलगी सुरेश खान उर्फ ​​अरिबा यांच्यासोबत पेट्रोल पंपावर सीएनजी भरण्यासाठी आले होते. सीएनजी भरत असताना कर्मचारी रजनीश कुमार याने त्यांना गाडीतून उतरण्यास सांगितले. पण खान कुटुंबाने नकार दिला. रजनीश कुमारने गाडीत बसून गॅस भरणे धोकादायक असल्याचे सांगितले. तरीही त्यांनी ऐकले नाही. यामुळे कुमारने  सीएनजी भरण्यास नकार दिला. 

एहसान यांच्या कुटुंबाला या गोष्टीचा प्रचंड राग आला. त्यांनी कुमारशी भांडण केले आणि त्याला शिवीगाळ करण्यास सुरुवात केली. कुमारने विरोध केला तेव्हा एहसान खानची मुलगी हातात रिव्हॉल्व्हर घेऊन गाडीतून उतरली. तिने रिव्हॉल्व्हर कुमारच्या छातीवर रोखले. त्यानंतर तिने त्याला जीवे मारण्याची धमकी दिली. तरुणीने इतक्या गोळ्या मारीन की घरचे ओळखू शकणार नाहीत, असं धमकावल्याचा आरोप आहे. हा सगळा गोंधळ पाहून पेट्रोल पंपावरील इतरांना त्यांना समजवण्याचा प्रयत्न केला. मात्र, हा सगळा प्रकार तिथे बसवलेल्या सीसीटीव्ही कॅमेऱ्यात कैद झाली.

#HardoiPolice
थाना बिलग्राम पुलिस द्वारा मु0अ0सं0 268/25 धारा 115(2)/352/351(3) बीएनएस व धारा 30 आर्म्स एक्ट से संबंधित कृत कार्यवाही के संबंध में-#UPPolicepic.twitter.com/hsYiegkb1v

— Hardoi Police (@hardoipolice) June 16, 2025

दरम्यान, रजनीश कुमार याने याप्रकरणी पोलिसांकडे तक्रार दाखल केली. तक्रारीच्या आधारे पोलिसांनी एहसान खान त्याची मुलगी आणि पत्नीविरुद्ध गुन्हा दाखल केला आहे. वडील आणि मुलीला ताब्यात घेण्यात आले आहे आणि रिव्हॉल्व्हर जप्त करण्यात आले आहे.