मंडई खाजगीकरणाचा विषय हाणून पाडला स्थायी सभा : डिझाईन करण्याआधीच मक्तेदाराला दिले पैसे

सोलापूर :
शहरातील मंडई खाजगीकरणाचा प्रशासनाने घातलेला घाट नगरसेवक आनंद चंदनशिवे यांनी स्थायी समितीत शुक्रवारी हाणून पाडला. वादळी चर्चेनंतर सभापती पद्माकर काळे यांनी हा विषय चर्चेसाठी सर्वसाधारण सभेकडे पाठविण्याचा निर्णय घेतला.
सभापती पद्माकर काळे यांच्या अध्यक्षतेखाली स्थायी समितीची सभा झाली. जिल्‘ातील ज्येष्ठ नेते व माजी खासदार प्रतापसिंह मोहिते-पाटील यांना श्रद्धांजली वाहून सभा तहकूब करण्यात आली. पुन्हा अर्ध्या तासाने सभा घेण्यात आली. सभेत प्रशासनाने दाखल केलेला मंडई विभाग खाजगीकरणाचा विषय चर्चेला आला. मंड्या तोट्यात असल्याने खाजगीकरण करणे गरजेचे असल्याचे मत अनिल पल्ली, दिलीप कोल्हे यांनी व्यक्त केले. मात्र आनंद चंदनशिवे यांनी जोडभावीपेठ, लक्ष्मी मंडई, सुपर मार्केट या मंड्या बीओटीवर बांधण्याची तयारी झाली आहे. कस्तुरबा मंडईचाही ११ मजली बांधकामाचा प्रस्ताव तयार आहे. असे असताना खाजगीकरण कसे करता येईल? असा सवाल केला. मंडई विभागाची दररोजची उलाढाल १४ लाख दाखविली आहे. पण थकबाकी किती याचा हिशोब दिलेला नाही. ओटे, गाळे वसुलीची मोठी रक्कम येणे बाकी असल्याचे निदर्शनाला आणून दिले. चर्चेअंती हा विषय सर्वसाधारण सभेकडे पाठविण्याचा निर्णय झाला.
त्यानंतर नगरोत्थानमधील २७ कोटींच्या तीन रस्त्यांची कामे आवताडे कन्स्ट्रक्शनला देण्याच्या विषयावर वादळी चर्चा झाली. सुरेश पाटील यांनी आयुक्तांनी घेतलेल्या धाडसी निर्णयाचे कौतुक केले. मात्र प्रशासनाने केलेल्या चुका चव्हाट्यावर आणल्या. या रस्त्यांचा प्रकल्प अहवाल एका कंपनीने तर डिझाईन दुसर्‍या कंपनीने बनविल्याचे प्रस्तावात नमूद आहे. पण रस्त्यांचे डिझाईन उपलब्ध नसताना प्रशासनाने संबंधित ठेकेदाराला १ कोटी २0 लाख रुपये कसे अदा केले? असा सवाल उपस्थित केला. यावर सुमारे दोन तास वादळी चर्चा चालली. बहुमताने हे विषय मंजूर करण्यात आले.
इन्फो....
स्थायी सभा बंदिस्त
स्थायी समितीच्या आजच्या सभेत मंडई विभागाचे खाजगीकरण व नगरोत्थानमधील तीन रस्त्यांचा ठेका देण्याचा विषय होता. त्यामुळे सभापती काळे यांनी सभागृह व कार्यालयात सदस्य वगळता सर्वांना प्रवेश बंद केला होता. कार्यालयास आतून कडी घालण्यात आली होती.