Operation Sindhu: इराण, इस्रायलमधून आणखी १,१०० भारतीय मायदेशात, विमान कंपन्यांची मध्य-पूर्वेतील उड्डाणे थांबली
By ऑनलाइन लोकमत | Updated: June 25, 2025 06:24 IST2025-06-25T06:23:03+5:302025-06-25T06:24:12+5:30
Operation Sindhu Evacuation: मंगळवारी सकाळी ८:२० वाजता अम्मानहून एक चार्टर्ड विमान दिल्ली विमानतळावर उतरले. त्यातून इस्रायलमधील भारतीय मायदेशात परतले.
Operation Sindhu: इराण, इस्रायलमधून आणखी १,१०० भारतीय मायदेशात, विमान कंपन्यांची मध्य-पूर्वेतील उड्डाणे थांबली
नवी दिल्ली : इराण आणि इस्रायलमध्ये सुरू असलेल्या संघर्षाच्या पार्श्वभूमीवर भारताने मंगळवारी इराणमधून आणि इस्रायलमधून १,१०० भारतीय नागरिकांना सुरक्षितपणे मायदेशात परत आणले. त्यामुळे मायदेशात आणलेल्या भारतीयांची संख्या ३,१७० इतकी झाली आहे.
परराष्ट्र मंत्रालयाचे प्रवक्ते रणधीर जयस्वाल यांनी सांगितले की, इराणमधील मशहद शहरातून मंगळवारी पहाटे ३:३० वाजता एक विशेष विमान दिल्ली विमानतळावर उतरले, ज्यातून २९२ भारतीय नागरिक परत आले. यामध्ये २९० भारतीयांसोबत एक श्रीलंकेचा नागरिकही आहे.
मंगळवारी सकाळी ८:२० वाजता अम्मानहून एक चार्टर्ड विमान दिल्ली विमानतळावर उतरले. त्यातून इस्रायलमधील भारतीय मायदेशात परतले. इस्रायलमधून या भारतीयांना जॉर्डनमध्ये नेण्यात आले व तेथील अम्मानहून ते भारताकडे रवाना झाले. त्यानंतर आणखी काही भारतीय नागरिकांना हवाई दलाच्या विमानाने अम्मानहून दिल्लीमध्ये आणण्यात आले.
भारतीय विमान कंपन्यांची मध्य-पूर्वेतील उड्डाणे थांबली
वाढत्या तणावामुळे भारतीय विमान कंपन्यांनी मध्य-पूर्वेतील विमान उड्डाणे तूर्त स्थगित केली आहेत. याचा हजारो प्रवाशांवर परिणाम झाला असून, कंपन्यांनाही फटका बसला आहे.
मध्य-पूर्वेतील काही हवाई क्षेत्र बंद झाल्यामुळे एअर इंडिया एक्स्प्रेसने या भागातील उड्डाणे तात्पुरती थांबविली आहेत, असे या भागात १५ पेक्षा अधिक ठिकाणी सेवा देणाऱ्या एअरलाईनने म्हटले आहे.
इंडिगोने सांगितले की, सेवा लवकर सुरू करण्याकडे लक्ष दिले जात आहे. आम्ही परिस्थितीचे बारकाईने निरीक्षण करीत आहोत. दुबई, दोहातील विमानतळ नेहमीच गजबजलेली असतात. युरोप आणि अमेरिकेला जाणाऱ्या विमानांसाठी ही दोन्ही विमानतळ महत्त्वाची ठरतात.