Operation Sagar Bandhu : श्रीलंकेत दितवाह चक्रीवादळामुळे विध्वंस, १२३ जणांचा मृत्यू; मदतीसाठी भारताचं 'ऑपरेशन सागर बंधू'
By ऑनलाइन लोकमत | Updated: November 29, 2025 15:37 IST2025-11-29T15:36:21+5:302025-11-29T15:37:13+5:30
Operation Sagar Bandhu : श्रीलंकेत दितवाह चक्रीवादळामुळे मुसळधार पाऊस आणि पुराने थैमान घातलं आहे. जनजीवन विस्कळीत झालं आहे.
Operation Sagar Bandhu : श्रीलंकेत दितवाह चक्रीवादळामुळे विध्वंस, १२३ जणांचा मृत्यू; मदतीसाठी भारताचं 'ऑपरेशन सागर बंधू'
श्रीलंकेत दितवाह चक्रीवादळामुळे मुसळधार पाऊस आणि पुराने थैमान घातलं आहे. जनजीवन विस्कळीत झालं आहे. आपत्ती व्यवस्थापन केंद्राने (डीएमसी) दिलेल्या माहितीनुसार, आतापर्यंत १२३ लोकांचा मृत्यू झाला आहे, तर १३० जण अजूनही बेपत्ता आहेत. श्रीलंकेच्या अनेक भागात मुसळधार पाऊस आणि भूस्खलन झालं आहे, ज्यामुळे लाखो लोक प्रभावित झाले आहेत.
श्रीलंकेच्या अधिकाऱ्यांनी सांगितलं की सशस्त्र दलांच्या मदतीने मदत कार्य सुरू आहे आणि आतापर्यंत ४३,९९५ घरं उद्ध्वस्त झालेल्या लोकांना सरकारी कल्याण केंद्रांमध्ये हलवण्यात आलं आहे. श्रीलंकेच्या सरकारने अडकलेल्या लोकांना वाचवण्यासाठी लष्करी हेलिकॉप्टर आणि बोटींचा वापर केला आहे. दितवाह चक्रीवादळामुळे शुक्रवारी श्रीलंकेच्या उत्तर आणि मध्य भागात मुसळधार पाऊस आणि भूस्खलन झालं. मुसळधार पावसामुळे अंदाजे ४४,००० लोक प्रभावित झाले आणि अनेकांना तात्पुरत्या मदत छावण्यांमध्ये पाठवण्यात आलं.
पावसाचं थैमान! श्रीलंकेत भीषण पूर, ५६ जणांचा मृत्यू; ६० जण बेपत्ता, ६०० घरांचं मोठं नुकसान
अनेक भागात पाणी साचल्याने सार्वजनिक सेवा विस्कळीत होत आहेत आणि पायाभूत सुविधांचं मोठं नुकसान होत आहे. श्रीलंकेच्या लष्कर आणि पोलीस दलांनी मदत आणि बचावकार्य तीव्र केले आहे. कोलंबोपासून सुमारे २२० किलोमीटर ईशान्येकडील पोलोन्नरुवा येथील पुलावर अडकलेल्या तेरा जणांना हेलिकॉप्टरने वाचवण्यात आलं. मुसळधार पावसामुळे आंतरराष्ट्रीय विमानतळावरील कामकाज विस्कळीत झालं, ज्यामुळे १५ उड्डाणं त्रिवेंद्रम आणि कोचीन विमानतळांवर वळवण्यात आली.
My heartfelt condolences to the people of Sri Lanka who have lost their loved ones due to Cyclone Ditwah. I pray for the safety, comfort and swift recovery of all affected families.
— Narendra Modi (@narendramodi) November 28, 2025
In solidarity with our closest maritime neighbour, India has urgently dispatched relief…
दितवाह चक्रीवादळाचा तडाखा बसलेल्या श्रीलंकेला मदत करण्यासाठी भारताने ऑपरेशन सागर बंधू सुरू केलं आहे. या उपक्रमाचा एक भाग म्हणून, भारतीय हवाई दलाचे विमान सुमारे १२ टन मदत साहित्य घेऊन श्रीलंकेत पोहोचले, ज्यात ताडपत्री, ब्लँकेट, स्वच्छता किट, अन्नपदार्थ आणि इतर आवश्यक साहित्य समाविष्ट आहे.
भारतीय नौदलानेही मदत साहित्य पाठवलं आहे. आयएनएस विक्रांत आणि आयएनएस उदयगिरी येथून सुमारे ४.५ टन रेशन आणि २ टन रेशन पोहोचवण्यात आलं. ही मदत भारत सरकारने नेबरहूड फर्स्ट धोरणांतर्गत पाठवली आहे आणि श्रीलंकेतील परिस्थिती बदलत असताना भारताने आणखी मदत पाठवण्याचं आश्वासन दिलं आहे.