ना नितीश कुमार, ना PM नरेंद्र मोदी...बिहारच्या युवकांची पहिली पसंती कोण?; सर्व्हेने सगळेच हैराण

बिहारमध्ये नोव्हेंबर-डिसेंबर दरम्यान विधानसभा निवडणुका होण्याची शक्यता आहे. या निवडणुकीत महाआघाडीविरुद्ध एनडीए अशी थेट लढत होईल.

पटणा - बिहारमध्ये या वर्षीच्या अखेरीस होणाऱ्या विधानसभा निवडणुकीआधी राज्यातील वातावरण चांगलेच तापले आहे. प्रत्येक पक्ष निवडणुकीच्या तयारीला लागला आहे. त्यातच Poll Tracker ओपिनियन पोलमध्ये हैराण करणारी आकडेवारी समोर आली आहे. या आकडेवारीनुसार राज्यातील युवकांमध्ये सर्वात लोकप्रिय नेता म्हणून राहुल गांधी यांचं नाव पुढे आले आहे. तुमचा आवडता राष्ट्रीय नेता कोणता असा प्रश्न युवकांना विचारला होता. त्यावर ४७ टक्के युवकांनी राहुल गांधी यांचे नाव घेतले तर पंतप्रधान नरेंद्र मोदी यांना ३९ टक्के युवकांनी पसंती दर्शवली तर १४ टक्के युवकांनी इतर नावाला पसंती दिली.

NDA आणि महाआघाडीत लढत

बिहारमध्ये नोव्हेंबर-डिसेंबर दरम्यान विधानसभा निवडणुका होण्याची शक्यता आहे. या निवडणुकीत महाआघाडीविरुद्ध एनडीए अशी थेट लढत होईल. परंतु या निवडणुकीत अनेक समीकरणे बदलले आहेत. जानेवारी २०२४ मध्ये नितीश कुमार यांनी महाआघाडीची साथ सोडून एनडीएसोबत गेलेत. त्यामुळे राज्याच्या राजकारणाला नवे वळण लागले. भाजपा आणि जेडीयू यांनी मिळून राज्यात सरकार बनवले. नितीश कुमार मुख्यमंत्री म्हणून मैदानात उतरले. दुसरीकडे विरोधकांकडून महाआघाडीचे नेतृत्व तेजस्वी यादव करू शकतात. 

काँग्रेस निर्णायक भूमिकेत 

Poll Tracker सर्व्हेनुसार, बिहारच्या युवकांमध्ये राहुल गांधी यांची लोकप्रियता वाढली आहे. ४७ टक्के युवकांची पहिली पसंती राहुल गांधी यांच्या नावाला आहे. त्यामुळे यंदाच्या बिहार निवडणुकीत काँग्रेस सहकार्याच्या नव्हे तर निर्णायक भूमिकेत दिसू शकते. काँग्रेसने अद्यापही मुख्यमंत्रि‍पदाचा चेहरा स्पष्ट केला नाही. त्यामुळे महाआघाडीत अद्याप संभ्रम आहे. 

दरम्यान, बिहार विधानसभा निवडणुकीत प्रशांत किशोर यांच्या जनसुराज पार्टीही मजबूतपणे उतरणार आहे. येणाऱ्या निवडणुकीत त्यांच्या पक्षाची मोठी भूमिका राहू शकते. बिहारमध्ये तिसरा पर्याय म्हणून प्रशांत किशोर यांना लोक किती साथ देतात हे निवडणुकीच्या निकालातूनच दिसून येईल. मात्र प्रशांत किशोर यांच्या राजकारणामुळे एनडीएसह महाआघाडीलाही आव्हान निर्माण झाले आहे.