354 डब्बे, 7 इंजिन अन् 4.5 किमी लांबी; या राज्यात धावली देशातील सर्वात लांब मालगाडी ‘रुद्रास्त्र’

Indian Railway: या ट्रेनमुळे भारताच्या मालवाहतूक क्षेत्रात एक नवीन अध्याय जोडला गेला आहे.

Indian Railway: भारतीय रेल्वेने ग्रँड कॉर्ड रेल्वे सेक्शनवर मालवाहतुकीच्या दिशेने एक ऐतिहासिक पाऊल उचलले आहे. या मार्गावर देशातील आतापर्यंतची सर्वात लांब मालवाहतूक ट्रेन 'रुद्रस्त्र' चे यशस्वीरित्या परीक्षण झाले. ३५४ वॅगन(डब्बे) आणि ७ इंजिन असलेली ही मालवाहतूक ट्रेन तब्बल ४.५ किमी लांबीची होती. हे ट्रेन पूर्व मध्य रेल्वेच्या डीडीयू विभागातील गंजख्वाजा स्टेशनपासून गढवा रोड स्टेशनपर्यंत चालवली जात होती. 

३५४ वॅगन आणि ७ इंजिन असलेली 'रुद्रस्त्र'
गंजख्वाजा स्टेशनपासून गढवा रोडपर्यंत सुमारे २०० किमी अंतरावर धावणाऱ्या या मालवाहतूक ट्रेनला 'रुद्रस्त्र' असे नाव देण्यात आले. ही ट्रेन सहा रिकाम्या बॉक्सऑन रॅक जोडून तयार करण्यात आली आहे. रुद्रस्त्र मालगाडी सोननगरपर्यंत डेडिकेटेड फ्रेट कॉरिडॉर (डीएफसी) आणि नंतर गढवा रोडपर्यंत सामान्य ट्रॅकवर धावली. हे अंतर सरासरी ४० किमी प्रति तास वेगाने सुमारे ५ तासांत पूर्ण केले. ट्रेनची लांबी आणि भार लक्षात घेता, ही एक उत्कृष्ट कामगिरी मानली जाते.

वेळ, संसाधने आणि खर्चात बचत होईल
रेल्वे अधिकाऱ्यांच्या मते, जर हे सहा रॅक वेगवेगळे चालवले गेले, तर क्रू आणि मार्ग निश्चितीसारख्या प्रक्रिया सहा वेळा कराव्या लागतील. 'रुद्रस्त्र' म्हणून एकत्रितपणे काम केल्याने वेळ, श्रम आणि संसाधनांची लक्षणीय बचत झाली आहे. यामुळे भविष्यात मालवाहतूक अधिक जलद आणि किफायतशीर होईल.

🚆 *भारतीय रेल में नया कीर्तिमान!*
डीडीयू मंडल ने देश मे पहली बार 4.5 किमी लंबी 'रूद्रास्त्र' मालगाड़ी चलाई — 354 वैगन, 6 रेक, 7 इंजन। गंजख्वाजा से धनबाद मंडल के लिए चला रुद्रास्त्र।
समय की बचत, क्षमता में बढ़ोतरी और नवाचार का बेहतरीन उदाहरण! #IndianRailways#Rudrastrapic.twitter.com/fOHbzcivu8

— DRM Pt. Deen Dayal Upadhyaya Division (@DRM_DDU) August 7, 2025

डीडीयू विभागाच्या तांत्रिक कार्यक्षमतेचा पुरावा
'रुद्रस्त्र'चे यशस्वी ऑपरेशन हे डीडीयू विभागाच्या कार्यक्षमता, समन्वय आणि नाविन्याचे उदाहरण आहे. येथे मालगाड्यांच्या डब्यांची दुरुस्ती आणि तांत्रिक तपासणी करण्याचे आणि त्यांना पुन्हा जोडण्याचे काम केले जाते. हा प्रयत्न भारतीय रेल्वेचे आधुनिकीकरण आणि नाविन्यपूर्णतेकडे एक मजबूत पाऊल आहे.

जगातील सर्वात लांब मालगाडी कोणती?
पूर्व मध्य रेल्वेच्या मुख्य जनसंपर्क अधिकारी सरस्वती चंद्रा म्हणाल्या की, 'रुद्रस्त्र' हे केवळ संसाधनांच्या चांगल्या वापराचे उदाहरण नाही, तर भविष्यातील मालवाहतुकीसाठी एक आदर्श मॉडेल ठरू शकते. यामुळे वेळ, खर्च आणि श्रम वाचतील. सध्या जगातील सर्वात लांब मालगाडीचा विक्रम ऑस्ट्रेलियाच्या बीएचपी कंपनीकडे आहे. ती ट्रेन ७.३ किमी लांबीची असून, त्यात ६८२ वॅगन आहेत. 

ग्रँड कॉर्ड रेल सेक्शन काय आहे?
ग्रँड कॉर्ड रेल सेक्शन हा भारतीय रेल्वेचा एक अतिशय महत्त्वाचा मार्ग आहे, जो पंडित दीनदयाळ उपाध्याय जंक्शन (डीडीयू) पासून सुरू होतो आणि गया मार्गे आसनसोलला जातो. हावडा-नवी दिल्ली मार्गाचा हा सर्वात व्यस्त आणि सर्वात लहान विभाग आहे. कोळसा, स्टील, सिमेंट सारख्या जड मालवाहतुकीची वाहतूक प्रामुख्याने या विभागात केली जाते.