मकर संक्रांती ते चैत्र पौर्णिमा; चार महिने चालणार हरिद्वारचा अर्धकुंभ, वाचा शाही स्नानाचे संपूर्ण वेळापत्रक

हरिद्वारमध्ये भक्तीचा महासंगम होणार असून अर्धकुंभ २०२७ चे वेळापत्रक जाहीर करण्यात आलं आहे.

Haridwar Ardh Kumbh Mela 2027: सनातन धर्मातील श्रद्धेचा महाकुंभ मानला जाणारा अर्धकुंभ मेळा २०२७ पुढील वर्षी उत्तराखंडमधील हरिद्वार येथे रंगणार आहे. जानेवारी ते एप्रिल २०२७ या चार महिन्यांच्या कालावधीत हा भव्य सोहळा पार पडेल. मेळा प्रशासनाने नुकतीच या सोहळ्यातील प्रमुख १० स्नान पर्वणींची अधिकृत घोषणा केली असून, यात ३ विशेष अमृत (शाही) स्नानांचा समावेश आहे.

चार महिने चालणार भक्तीचा उत्सव

मेळा अधिकारी सोनिका सिंह यांनी दिलेल्या माहितीनुसार, १४ जानेवारी २०२७ (मकर संक्रांती) पासून या मेळ्याला सुरुवात होईल आणि २० एप्रिल २०२७ (चैत्र पौर्णिमा) रोजी सांगता होईल. या काळात देश-विदेशातून करोडो भाविक गंगा मातेच्या चरणी नतमस्तक होण्यासाठी हरिद्वारमध्ये दाखल होतील.

तिथी / सण	दिनांक	स्नानाचे स्वरूप
मकर संक्रांती	१४ जानेवारी २०२७	पहिले प्रमुख स्नान
मौनी अमावस्या	६ फेब्रुवारी २०२७	दुसरे स्नान
वसंत पंचमी	११ फेब्रुवारी २०२७	तिसरे स्नान
माघ पौर्णिमा	२० फेब्रुवारी २०२७	चौथे स्नान
महाशिवरात्री	६ मार्च २०२७	पाचवे स्नान (पहिले अमृत स्नान)
फाल्गुन अमावस्या	८ मार्च २०२७	सहावे स्नान (दुसरे अमृत स्नान)
नव संवत्सर (गुढीपाडवा)	७ एप्रिल २०२७	सातवे स्नान
मेष संक्रांती	१४ एप्रिल २०२७	आठवे स्नान (तिसरे अमृत स्नान)
विशेष स्नान	१५ एप्रिल २०२७	नऊवे स्नान
चैत्र पौर्णिमा	२० एप्रिल २०२७	अंतिम स्नान (सांगता)

अर्धकुंभाचे पौराणिक महत्त्व

समुद्रमंथनातून जेव्हा अमृत कलश बाहेर आला, तेव्हा देव आणि दानव यांच्यात झालेल्या युद्धात अमृताचे थेंब पृथ्वीवर चार ठिकाणी पडले. हरिद्वार, प्रयागराज, उज्जैन आणि नाशिक. जिथे हे थेंब पडले, तिथे कुंभमेळा भरतो. दर ६ वर्षांनी अर्धकुंभ आणि दर १२ वर्षांनी पूर्ण कुंभ आयोजित केला जातो.